ԵՐԵՎԱՆ, 21 մարտի — Sputnik. Մարտի 21-ն աշխարհում նշվում է որպես պոեզիայի միջազգային օր: Այն նշելու որոշումը կայացվել է 1999թ-ին ՅՈՒՆԵՍԿՕ-ի կողմից: Հաջորդ տարի տոնն առաջին անգամ նշվել է Փարիզում, ապա տարածվել ամբողջ աշխարհում:
Օրվա խորհուրդը ժամանակակից մարդու առջև ծառացած հոգևոր խնդիրները պոեզիայի միջոցով հաղթահարելն է: Բացի այդ, այն փոքր հրատարակչություններին ու սկսնակ գրողներին հնարավորություն է ընձեռում ներկայանալ ընթերցողների լայն շրջանակներին:
Հայաստանում ևս այսօր նշվել է Պոեզիայի միջազգային օրը: Մայրաքաղաք Երևանի ու հանրապետության խոշոր քաղաքների մշակութային ու կրթական հաստատություններում, հանրային վայրերում օրվա ընթացքում կազմակերպվել են հանրային ընթերցումներ, ֆլեշմոբեր, գրական քննարկումներ, գրողներին նվիրված ֆիլմերի դիտումներ, դասախոսություններ:
Միջոցառումներին իրենց աշխատություններով մասնակցել են նաև ժամանակակից գրողներ, գրականագետներ, մշակույթի և արվեստի գործիչներ:
ՅՈՒՆԵՍԿՕ-ն նաև զանգվածային լրատվամիջոցներին է կոչ անում միանալ նախաձեռնությանն ու իրենց ընթերցողներին ներկայացնել պոեզիան:
Sputnik Արմենիան ևս միացել է համաշխարհային ձեռնարկին: Ընդ որում, Sputnik. Ընթերցում նախագիծն ընդգրկում է ոչ թե տարվա մեջ միայն մեկ օր, այլ անհամեմատ ավելի լայն ժամանակահատված: Ընթերցումները, որոնց մասնակցում են տարբեր բնագավառները ներկայացնող ճանաչված անհատներ, մեկնարկել է 2016թ-ի փետրվարից և շարունակվելու է նաև մարտի 21-ից հետո:
Նշենք, որ նախագիծը 2015 թվականին մեկնարկել է Sputnik-Ղրղըզստանում։ Ապա նախաձեռնությանը միացել են Sputnik-Մոլդովան, Sputnik-Աբխազիան և Sputnik-Հարավային Օսեթիան։
Հայաստանում Sputnik. Ընթերցում նախագծի առաջին մասնակիցը Sputnik Արմենիայի ղեկավար Դմիտրի Պիսարենկոն էր, ով նախագծի շրջանակներում ընթերցեց Միքայել Նալբանդյանի «Ազատություն» բանաստեղծությունը։ Նախագծին մասնակցել են նաև հայտնի դերասան, ռեժիսոր և պրոդյուսեր Միքայել Պողոսյանը՝ Հովհաննես Թումանյանի, ռեփեր Միշոն՝ Պարույր Սևակի, Երևանի փոխքաղաքապետ Արամ Սուքիասյանը՝ Եղիշե Չարենցի ստեղծագործությունների իրենց ընթերցումներով:
Հետաքրքրական է, որ աշխարհին հայտնի հնագույն չափածո ստեղծագործությունների հեղինակը կին է. մ.թ.ա. 23-րդ դարում քրմուհի-բանաստեղծուհի Էն Հեդու Անան՝ աքադական Սարգոն արքայի դուստրը, ներբողներ է հյուսել լուսնի Նան աստծո և նրա դստեր՝ վաղորդյան Ինան աստղի մասին:
