ԵՐԵՎԱՆ, 21 մարտի- Sputnik. Ամերիկացի գրոսմայստեր Հիկարու Նակամուրան տուգանվել է Հավակնորդների մրցաշարից իրեն հասանելիք մրցանակային գումարի 10%-ի չափով, քանի որ Արոնյանից կրած պարտությունից հետո չի ներկայացել պարտիայի պարտադիր մեկնաբանմանը:
Կանոնակարգի համաձայն` շախմատիստը ստիպված է լինելու իրեն հասանելիք մրցանակային գումարի 5%-ը տալ մրցաշարի կազմկոմիտեին, 5% —ը՝ միջազգային ֆեդերացիային:
Հիշեցնենք, որ մարտի 18-ին Հավակնորդների մրցաշարի 6-րդ տուրում Արոնյանը մրցում էր ԱՄՆ ներկայացուցիչ Հիկարու Նակամուրայի հետ: Տուրի ամենաերկար պարտիան հենց Արոնյան-Նակամուրա մրցախաղն էր, որտեղ Արոնյանը սպիտակներով հաղթեց մրցակցին:
Պարտիայի եզրափակիչ փուլում դրամատիկ իրադարձություններ տեղի ունեցան: Կուլմինացիայից առաջ դասավորությունը ոչ-ոքի արդյունք էր հուշում, թեև սպիտակներով խաղացող մասնակիցը հաղթելու լավ հնարավորություն ուներ:
Մինչ այդ իրավիճակը, սպասողական խաղ էր ընթանում, որտեղ Նակամուրան մի քանի անգամ արդեն խաղացել էր արքայով: Նա ձեռքը մեխանիկորեն մեկնեց թագավորին և միայն խաղաքարը բռնելուց հետո հասկացավ, որ սխալվել է: Ըստ կանոնների` նա պարտավոր էր քայլ կատարել այն ֆիգուրով, որին դիպել էր։ Արդյունքում սպիտակներով խաղացող Արոնյանը հեշտությամբ հաղթեց մրցակցին:
