ԵՐԵՎԱՆ, 20 մարտի- Sputnik, Անի Լիպարիտյան. Նախկինում հայաստանցի գեղասահորդները մեկնում էին տարբեր մրցույթների և կատակում՝ «վերջից առաջին տեղը կզբաղեցնենք», Sputnik Արմենիային պատմեց գեղասահքի մարզիչ և Իրինա Ռոդնինայի անվան գեղասահքի մարզադպրոցի մեթոդիստ Ալինա Բադալյանը:
«Այսօր երեխաները ոգևորված են, չէ՞ որ նրանց համար հիանալի հնարավորություն է բացվել: Մեծ հաճույքով են մարզվում: Իրինա Ռոդնինայի, Իրինա Սլուցկայայի և Եվգենի Պլյուշչենկոյի վարպետության դասերին մասնակցելուց ու նրանց հետ շփվելուց հետո հատկապես սկսնակ գեղասահորդներն ուզում են բարձունքներ նվաճել»,- պատմեց Բադալյանը:
Գեղասահքը հիվանդություններ է բուժում
Sputnik Արմենիայի զրուցակիցը պատմեց, որ գեղասահքը հրաշագործ և բուժիչ մարզաձև է: Արդեն մի քանի տարի է՝ Ալինան այլևս չի հիվանդանում, որովհետև նրան «բուժում» է սահադաշտը:
«Երևանի Կարապի լճի սահադաշտում սահող երեխաներն էլ չեն հիվանդանում: Այժմ նրանք մարզվում են այս ժամանակակից սահադաշտում, որը որակով չի զիջում եվրոպական հարթակներին»,- պատմեց նա:
Հայ մարզիչը գեղասահքով է զբաղվում 1972թ.-ից և ասում է, որ ընտրել է ձմեռային ամենագեղեցիկ մարզաձևերից մեկը:
«Երբ առաջին անգամ կանգնեցի սառույցի վրա, անկեղծ ասած, շատ անսովոր էր ինձ համար: Բայց առաջին օրվանից սիրեցի սառույցը, մինչ օրս աշխատում եմ որպես գեղասահքի մարզիչ: Սիրով փոխանցում եմ գիտելիքներս, ուզում եմ, որ իմ աշակերտները լավ մարզիկներ դառնան»,- ասաց Ալինան:
Նրա խոսքով՝ գեղասահքը հիանալի մարզաձև է. վերացնում է առողջական բոլոր խնդիրները, բարելավում երեխաների ֆիզիկական պատրաստվածությունը: Ու հետո գեղասահքը ոչ միայն սպորտ է, այլև՝ արվեստ:
Այս տարի նոր դպրոցում արդեն աշակերտների 2 ընդունելություն է կազմակերպվել: Մարզչի խոսքով՝ աշակերտներն ու ծնողները շատ ոգևորված են:
Սակայն մարզաձևով պետք է զբաղվել վաղ տարիքից: Դպրոցն ընդունում է 4-7 տարեկան երեխաներին, սակայն չի նշանակում, որ տաղանդաշատ երեխաները չեն կարող սովորել այստեղ:
Դպրոցում աշխատում է գեղասահքի 9 և հոկեյի մեկ մարզիչ, որը երեկոյան ժամերին է պարապում երեխաների հետ:
«Շատ եմ սիրում մեր մարզադպրոցը և ուզում եմ, որ առաջիկա 10 տարում մենք չեմպիոն ունենանք, ու նա միջազգային ասպարեզ դուրս գա»,- նշեց Բադալյանը:
Նա կարծում է, որ գեղասահորդի հաջողության գրավականը ճիշտ մարզիչն է, որը պարտավոր է սեր ու նվիրում սերմանել, սովորեցնել պայքարելու հմտությունները:
Ուժեղ կնոջ վարպետության դասը
Ժամանակակից սահադաշտը ոչ միայն աչք է շոյում, այլ նաև հույս է ներշնչում, որ շուտով Հայաստանում գեղասահքի աստղեր կհայտնվեն:
Ալինա Բադալյանը վարպետության դաս ցուցադրեց հատուկ Sputnik Արմենիայի համար՝ ևս մեկ անգամ ապացուցելով, որ ցանկության դեպքում կինը շատ բան կարող է անել:
«Մի անգամ ես պարտվեցի հուզմունքի և վախի պատճառով: Մարզիչս՝ Ռաֆայել Հարությունյանը, ճակատագրական խոսքեր ասաց ինձ. «Եթե դու հաջորդ անգամ այդպես ելույթ ունենաս ազատ ծրագրում, ապա այլևս չեմ աշխատի քեզ հետ»: Դա սթափեցրեց ինձ ու պայքարի ուժ արթնացրեց իմ մեջ: Հենց այդ ժամանակ որոշեցի հաղթահարել բոլոր բարդությունները: Ելույթ ունեցա ու առաջին տեղը զբաղեցրի»,- պատմեց Ալինան:
Զրույցի վերջում գեղասահորդուհին բոլոր կանանց շնորհավորեց գարնանային տոների կապակցությամբ:
«Կինը ուժեղ է և հաղթող: Ինձ թվում է՝ կինը պետք է միշտ ուժեղ լինի, որպեսզի հաղթահարի բարձունքները և ցույց տա, թե ինչի է ընդունակ»,- նշեց Բադալյանը:
Ի դեպ, կանանց միամսյակի կապակցությամբ Երևանի քաղաքապետարանը «Կանայք կարող են ավելին» խորագրով սոցիալական ակցիա է կազմակերպել: Նախագծի նպատակն է մայրաքաղաքի բնակիչներին ներկայացնել և կարևորել կանանց գործունեությունը, չէ՞ որ նաև նրանց ուժի և ձգտման շնորհիվ է զարգանում քաղաքը:
