ԵՐԵՎԱՆ, 20 մարտի — Sputnik. «Անմտություն կլիներ հեռացնել այդքան մեծ պտուղը: Հատկապես ծանր կլիներ կնոջ համար, քանի որ առաջին հղիությունն ավարտվել էր վիժումով»,- «Էրեբունի» բժշկական կենտրոնի ծննդօգնության գծով փոխտնօրեն Անդրանիկ Պողոսյանի խոսքն է մեջբերում Էրեբունի բժշկական կենտրոնի կայքը:
Ուռուցքի դեմ պայքարը պետք էր սկսել անմիջապես. մյուս բոլոր դեպքերում այն կսկսվեր ծննդաբերությունից հետո:
«Հղիության ընթացքում ուռուցքներն ավելի արագ են զարգանում: Հղի կնոջ օրգանիզմում ստեղծվում է մի իրավիճակ, որը նպաստում է պտղի բջիջների արագ զարգացմանն ու հասունացմանը, իսկ դրանից օգտվում են նաև ուռուցքային բջիջները: Ուռուցքն արդեն բավականին մեծ էր ախտորոշման պահին, և ծննդաբերությանը սպասելու պարագայում մեծ վտանգ կար այլ օրգաններում մետաստազներ առաջանալու»,- ասել է «Նաիրի» բժշկական կենտրոնի քիմիաթերապիայի բաժանմունքի վարիչ Լևոն Բադալյանը:
Քիմիաթերապիայի անցկացումը հակացուցված է հղիության առաջին եռամսյակում, քանի որ կարող է հղիության ընդհատման կամ պտղի մոտ լուրջ արատների ձևավորման պատճառ դառնալ: Հղիության երկրորդ և հատկապես երրորդ եռամսյակներում, հատուկ արձանագրությունների պահպանման պարագայում, հղի կինը կարող է գրեթե անվտանգ քիմիաթերապիա անցնել: Հիմնվելով արտասահմանյան փորձի վրա՝ հայ բժիշկները որոշել են քիմիաթերապիայի համապատասխան կուրսեր սկսել:
«Նաիրի» բժշկական կենտրոնի ուռուցքաբանները քիմիաթերապիան անցկացրել են «Էրեբունի» բժշկական կենտրոնի մանկաբարձ-գինեկոլոգների խիստ հսկողության պայմաններում: Բուժման երկու կուրսը 29-ամյա կինը հաղթահարել է լավ արդյունքներով` մայրը և պտուղը չեն տուժել, իսկ ուռուցքի չափսերը մասամբ փոքրացել են:
«Որոշեցինք հղիությունը հասցնել այն սահմանային ժամանակահատվածին, երբ հնարավոր կլինի երեխային կեսարյան հատմամբ անվտանգ դուրս բերել մոր արգանդից: 33-34 շաբաթականում փոքրիկը թե՛ էխոսկոպիկ, թե՛ դոպլեր հետազոտությամբ, արդեն «պատրաստ» էր: Ծնվեց 2.300 գր քաշով կենսունակ, առողջ երեխա»,- հայտնել է Անդրանիկ Պողոսյանը:
Ծննդաբերությունն անցել է առանց արտառոց միջադեպերի ու բարդությունների, ինչպես բժիշկն է հավաստիացնում, հետվիրահատական շրջանը՝ նույնպես: Սա Հայաստանում առաջին դեպքն է, երբ հղիությունն ընթացել է քիմիաթերապիայի կուրսերին զուգահեռ: Մինչ այս նմանատիպ դեպքերում ընդունված էր ընդհատել հղիությունը՝ մեծ պտղի հեռացմամբ: Այս անգամ արտասահմանյան փորձը հաջողությամբ կիրառել են «Էրեբունի» և «Նաիրի» բժշկական կենտրոնների բժիշկները: Նորաթուխ մայրիկը դեռ ուռուցքաբանի հսկողության տակ է: «Մայրը շարունակում է քիմիաթերապիան, որի բոլոր կուրսերի ավարտից հետո կիրականացվի կրծքագեղձի վիրահատական բուժումը»,- ասել է «Նաիրի» բժշկական կենտրոնի ուռուցքաբան Լևոն Բադալյանը:
«Ի դեպ, դեպքի հաջողության գործում մեծ դեր ուներ նաև կնոջ ու իր ընտանիքի լավատեսությունը հղիության ամբողջ ընթացքում: Անգամ պայմանավորվածություն կա՝ 2 տարի անց, վերջնականապես կազդուրվելուց հետո, ունենալ երկրորդ բալիկը…»,- հույս է հայտնել «Էրեբունի» բժշկական կենտրոնի ծննդօգնության գծով փոխտնօրեն Անդրանիկ Պողոսյանը:
