ԵՐԵՎԱՆ, 20 մարտի-Sputnik. Հայաստանում տուբերկուլոզով հիվանդացության ամենացածր մակարդակն ունի Վայոց Ձորի մարզը, ամենաբարձրը՝ Շիրակի մարզն ու Երևանը: ՀՀ առողջապահության նախարարության «Տուբերկուլոզի դեմ պայքարի ազգային կենտրոն» ՊՈԱԿ-ի տնօրեն Արմեն Հայրապետյանն ասաց, որ այդ հիվանդությունը տարածվում է նաև աշխատանքային միգրացիայի հաշվին:
«Կան հիվանդներ, ովքեր բուժումը սկսում են, մեկ ամիս անց առողջության դրական տեղաշարժի դեպքում կիսատ են թողնում բուժումը և մեկնում արտագնա աշխատանքի: Այդ դեպքում հիվանդությունն ավելի է ծանրանում: Ստացվում է` եթե նախկինում բուժվում էին դեղազգայուն տուբերկուլոզով, ապա հիմա վերադառնում են դեղակայուն ձևով կամ ծանր ու համակցված հիվանդությամբ»,-ասաց Հայրապետյանը:
Վերջին տվյալով՝ տուբերկուլոզով հիվանդ անձանց թիվը 700-ն է: Դիմելիության կամ բուժումն ընդհատելու պատճառով հիվանդությունը բարդացել է, ու գրանցվել է մահվան 42 դեպք:
Առաջիկայում առողջապահության նախարարությունը կառավարության հաստատմանն է ներկայացնելու Տուբերկուլոզի դեմ պայքարի 2016-2020թթ.-ի ծրագիրը, որի համաձայն՝ նոր սերնդի հակատուբերկուլոզային դեղեր են կիրառվելու, լուրջ շեշտադրում է լինելու լաբորատոր համակարգի հսկողության և որակի, ներհիվանդանոցային վարակը կանխելու ուղղությամբ:
