ԵՐԵՎԱՆ, 20 մարտի — Sputnik. Հանրապետական նշանակության «Գյուղատեղի Շինատեղ» հուշարձանի տարածքում մարտի 14-ին արձանագրված գանձագողությունը Սյունիքի մարզում առաջինը չէ: Իսկ այսօրինակ դեպքերը բավական հաճախ են տեղի ունենում: Պատժվում են արդյո՞ք օրինախախտները: Sputnik Արմենիայի թղթակիցը պարզաբանման համար դիմեց «Պահպանության ծառայություն» ՊՈԱԿ-ի տնօրեն Վլադիմիր Պողոսյանին:
«Սյունիքի մարզում այս ամսվա ընթացքում արձանագրված երկրորդ դեպքն է սա: Մարտի 10-ին Պատմական միջավայրի պահպանության մարզային ծառայության աշխատակիցը Վաղատին համայնքում գտնվող Որոտնավանք հանրապետական նշանակության հուշարձանի տարածք կատարած հերթական շրջայցի ընթացքում արձանագրել է, որ օժանդակ շինություններից մեկի տարածքում քանդվել է պատը, նաև երդիկը: Երդիկի ներսում փոս է փորված, հողն էլ՝ կուտակված է շինության բակում: ՊՈԱԿ-ն անմիջապես ահազանգել է քննչական կոմիտե», — նշեց Վլադիմիր Պողոսյանը:
Հանրապետական նշանակության «Գյուղատեղի Շինատեղ» հուշարձանի տարածքից գանձագողության դեպքը բացահայտվել է իրավապահների հետ փոխգործակցությամբ:
«Նկատի ունենալով հուշարձանների պահապանների շրջայցերի ընթացքում արձանագրած գանձախուզության դեպքերը, մարզային ծառայության պետն ավելի վաղ իրազեկել էր իրավապահներին՝ խնդրելով համապատասխան միջոցներ ձեռնարկել, ինչպես նաև առավել մեծ զգոնություն ցուցաբերել այդօրինակ դեպքերի բացահայտման ու կանխման ուղղությամբ: Բացահայտված գանձագողության վերոհիշյալ դեպքը թերևս դրա լավագույն օրինակն է: «Պահպանության ծառայություն» ՊՈԱԿ-ը հետամուտ է լինելու գանգաձողերին օրենքով սահմանված կարգով պատժելու հարցին»,- եզրափակելով խոսքը՝ վստահեցրեց Վլադիմիր Պողոսյանը:
