ԵՐԵՎԱՆ, 19 մարտի — Sputnik. Հայտարարությունն, իհարկե, անարձագանք չմնաց: «Անհայտ» անձինք, այսինքն կենդանասեր մարդկանց իր շուրջը համախմբող «Դինգո թիմ» կազմակերպության անդամները Sputnik Արմենիայի հետ զրույցում հաստատեցին, որ շներին իրենք են դուրս բերել «Յունիգրաֆ իքսի» տարածքից:
«Տարել ենք ընդամենը 4 շուն, որոնցից երկուսը մեր կողմից ստերջացված շներ էին: Մեկը սատկած էր, վերցրինք մեզ հետ, որովհետև շներն արդեն հոշոտում էին կենդանուն, իսկ չորրորդ շունն էլ անչափ հյուծված էր, մտածեցինք՝ կկարողանանք փրկել, բայց մեքենայի մեջ նա էլ սատկեց»,- պատմեց «Դինգո թիմ» կազմակերպության հիմնադիր նախագահ Օվսաննա Հովսեփյանը:
Նրա խոսքով՝ իրենք երկու մեքենայով են եղել, այսինքն ցանկության դեպքում էլ չէին կարող իրենց հետ 17 շուն տանել: Ընդ որում, «Յունիգրաֆ իքսի» տարածք էլ հնարավոր չէր մտնել «ապօրինաբար», որովհետև տարածքը շրջափակված է բարձր պարսպով:
«Մենք համոզեցինք պահակին, և նա բացեց դուռը: Սարսափելի տեսարան էր՝ ասես արյան գետ հոսեր, շները վախեցած նայում էին մեզ, ճաշի վրայի բորբոսի հաստությունը հասնում էր 3 սմ-ի»,- ասաց նա:
«Յունիգրաֆ իքս» ընկերության իրականացրած աշխատանքների որակի, կենդանիների նկատմամբ վատ վերաբերմունքի, դաժանաբար սպանելու մասին բողոքները նորություն չեն: Այս մասին պարբերաբար խոսվում է, ու հասարակությունն էլ շատ բուռն է արձագանքում այդ խոսակցություններին:
«Աստված տա, որ «Յունիգրաֆ» ընկերության ու նրա սեփականատերերի կյանքը հազար անգամ ավելի վատը լինի, քան փողոցային շներինը, անկեղծ եմ ասում` Աստծուն դիմելով: Դուք մարդ կոչվելու իրավունք չունեք…», — Facebook սոցցանցի «Դինգոյի» էջում այսպես է մեկնաբանել օգտատերերից մեկը:
Շատերն առաջարկում են «շներին ազատելու» նոր ակցիաներ կազմակերպել: Ոմանք շատ ավելի մարտական են տրամադրված և կոչ են անում ամեն կերպ պայքարել հենց «Յունիգրաֆ իքսի» դեմ: Ինչի՞ց են դժգոհ մարդիկ:
«Յունիգրաֆի» աշխատակիցները մի քանի օր առաջ տարան նաև Սաթենիկի 3 շներին: Սաթենիկը Sputnik Արմենիային պատմեց, որ թեև շները բակում էին ապրում, բայց ինքն էր խնամում ու կերակրում նրանց, հետևում շների առողջությանը, դեղորայք գնում:
Նրա խոսքով` խաղաղ շներ էին ու երբեք ագրեսիվ չեն եղել, որևէ մեկին չեն կծել: Սակայն հարևանները բողոքել են, թե իբր երեխաները շներից ինչ-որ հիվանդությամբ են վարակվել (ինչը Սաթենիկը ժխտում է), ու շներին տարել են:
Սաթենիկը կազմակերպության հետ առնչվող ծանոթների միջոցով պարզել է, որ շներին սպանելու են, թեև «Յունիգրաֆի» աշխատակիցներն իբր շներին տարել են «բուժելու և իրենց մոտ պահելու» համար:
«Մեզ ասացին, որ փամփուշտներն ափսոսում են, ուրիշ կերպ կսպանեն», — ասաց Սաթենիկը:
Նա գնացել է շների հետևից ու կլինիկայի տարածքում մի մեծ փոս է տեսել, ասում է՝ շներին սպանելուց հետո հենց այդ փոսում են թաղում: Սաթենիկի կարծիքով՝ դրա ապացույցն այն է, որ կլինիկայում շատ քիչ թվով շներ կային, եղածներն էլ անվերջ կլանչում էին:
Սաթենիկի շներին տարել են, բայց հենց նրա դեմ են բողոք ներկայացրել ոստիկանություն, իբր նա «Յունիգրաֆ իքսի» երկու աշխատակցի է ծեծել: Այնինչ Սաթենիկը վստահեցնում է, որ պարզապես փորձել է խանգարել, որ իր շանը պարանով չբռնեն ու չտանեն:
«Մեզ ասում են, որ շներին այնտեղ են պահում, սակայն այնտեղ շատ քիչ շուն կար: Բոլորն այնտեղ չէին տեղավորվի», — ասաց Սաթենիկը:
Բացի այդ, նա ու «Դինգո թիմի» ներկայացուցիչները պնդում են, որ «Յունիգրաֆի» աշխատակիցները շներին կլինիկայում «չումկա» վիրուսով են վարակում ու փողոց բաց թողնում: Նրա խոսքով` այդպես մյուս շներին են վարակում, որոնց մի մասը սատկում է, իսկ մյուսներն էլ քաղաքացիների ահազանգով հայտնվում են կլինիկայում ու այնտեղ սատկում: Կամ էլ պարզապես սպանում են նրանց:
«Յունիգրաֆ իքս» ընկերության մամուլի քարտուղար Լիլիթ Գրիգորյանն էլ մեզ հետ զրույցի ընթացքում հրաժարվեց մեկնաբանել շներին փողոց բաց թողնելու մասին խոսակցությունները՝ ասելով, որ դրանով զբաղվում է ոստիկանությունը:
Մամուլի քարտուղարը չգիտեր նաև այն մասին, թե քանի շուն է այս պահին գտնվում կլինիկայում: Միայն նշեց, որ «Յունիգրաֆ իքս» ընկերության տարածքում կարող է միաժամանակ մոտ 200 կենդանի տեղավորվել:
Ինչ վերաբերում է շների սպանությանը, Գրիգորյանը նշեց, որ իրենք իրականացնում են այն գործառույթները, որոնք պարտավորվել են կատարել քաղաքապետարանի հանձնարարությամբ:
««Յունիգրաֆ իքսը» հաղթել է քաղաքապետարանի հայտարարած մրցույթում, որի պայմանագրի պարտադիր կետերից մեկը կենդանիների վնասազերծումն ու ստերջացումն է: Շների ճակատագիրը որոշում են մասնագետները: Այն շները, որոնք վիրուսակիր են ու տարածում են այդ վիրուսը, հիվանդ են ու ագրեսիվ, նրանց քնեցնում են», — ասաց Գրիգորյանը:
Նա հայտնեց, որ քնեցնելուց հետո շներին տեղափոխում են քաղաքապետարանի հատկացրած հատուկ վայր, որտեղ էլ թաղում են:
Գրիգորյանն ընդգծեց, որ կլինիկան զբաղվում է միայն փողոցային շներով, որոնց հիմնական տարբերանշանն այն է, որ վզակապ չեն ունենում և նրանց կողքին տեր չի լինում:
Նրա խոսքով` երբեմն քաղաքացիների խնդրանքով վերադարձնում են փողոցային շներին, սակայն պայմանով, որ կենդանիներն այլևս չեն խանգարի բնակիչներին:
«Մենք մեր աշխատանքն իրականացնում ենք բացառապես քաղաքացիների խնդրանքով: Հանրային հայտ գոյություն ունի, հասցեները տրամադրվում են հենց քաղաքացիների կողմից, նրանք են խնդրում տանել շներին», — ասաց Գրիգորյանը:
Տեղեկություն են ստանում նաև տարբեր կառույցներից, այդ թվում` քաղաքապետարանի «թեժ գիծ» ծառայության միջոցով:
Մամուլի քարտուղարը հերքեց կենդանիների նկատմամբ դաժան վերաբերմունք դրսևորելու բոլոր մեղադրանքները՝ վստահեցնելով, որ նման փաստեր չկան, ու իրենք կիրառում են այն նույն մեթոդները, որոնք ընդունված են ամբողջ աշխարհում:
«Մենք կիրառում ենք ստերջացման ու քնեցման մեթոդները, ինչն անում է ամբողջ աշխարհը: Պարզապես դա ոչ բոլոր կենդանասերներին է դուր գալիս, այդ պատճառով էլ նրանք անիմաստ աղմուկ են բարձրացնում: Սակայն որևէ փաստ չունեն, փուչ մեղադրանքներ են», — ասաց Գրիգորյանը:
Նա վստահեցրեց, որ կլինիկան ուշադրություն չի դարձնելու այդ «շանտաժին» ու շարունակելու է լուծել քաղաքը թափառող շներից ազատելու բարդ խնդիրը, որի շնորհիվ քաղաքացիների անվտանգությունն է ապահովելու:
Փողոցում ապրող շների հարցն, իհարկե, լուծման կարիք ունի, սակայն կենդանասերներին հատկապես հուզում է այն հարցը, թե ինչպես է պատահում, որ քաղաքապետարանի հայտարարած մրցույթում միշտ հաղթում է «Յունիգրաֆ իքս» ընկերությունը: Ընկերություն, որը տարիներ շարունակ կենդանասերների թիրախն է դարձել:
Չի կարելի ասել, որ բոլոր թափառող շներն անվնաս են ու չեն կարող վարակ տարածել: Բնականաբար, կան շներ, որոնք իսկապես վտանգավոր են ու ագրեսիվ: Սակայն, միևնույն է, կենդանասերները շարունակելու են մերժել շների հետ դաժանաբար վարվելու մեթոդները, չէ՞ որ շունն այն միակ կենդանին է, որի հավատարմությունը սահմաններ չունի:
