ԵՐԵՎԱՆ, 19 մարտի — Sputnik. Սոնա Գրիգորյանն ապրում է Թաքսիմ հրապարակի մոտակայքում, առավոտյան պատրաստվում էր դուրս գալ տնից, երբ լսեց ահաբեկչության մասին լուրը:
«Ստամբուլի բնակիչներն այժմ խուճապի մեջ են, թեև իշխանությունն անընդհատ հորդորում է խուճապի չմատնվել, սակայն անհնար է՝ մարդիկ վախեցել են ու փակվել տներում»,- Sputnik Արմենիային ասաց Սոնա Գրիգորյանը:
Նրա խոսքով՝ վիրավորներից մեկը հայ է, անունը՝ Օքսան Խաչանյան, զոհվածներից մեկն էլ մանկահասակ երեխա է:
Սոնա Գրիգորյանը հայտնեց, որ անվտանգության նկատառումներից ելնելով՝ չեղյալ է հայտարարվել քրդերի տոնակատարությունը, որը միշտ նշվել է Թաքսիմ հրապարակում:
«Մարդիկ խոսում են, թե քրդերը սպառնացել են, որ եթե տոնակատարությունն արգելվի, նոր պայթյուններ կլինեն: Իշխանությունները ժողովրդին զգուշացնում են, որ տարօրինակ արկղեր տեսնելու դեպքում անմիջապես տեղյակ պահեն իրավապահ մարմինններին»,- ասաց Սոնա Գրիգորյանը:
Նշենք, որ պայթյունը տեղի է ունեցել Ստամբուլի կենտրոնական փողոցներից մեկում՝ Պալոյում: 5 մարդ մահացել է, 36 վիրավոր կա, որոնցից յոթի վիճակը ծանր է: Թուրքիայի իշխանությունը լրատվության տարածման արգելք է սահմանել, որպեսզի ժողովրդի մոտ խուճապ չառաջանա: Ստամբուլի կենտրոնը դատարկվել է, ոստիկանները շրջափակել են փողոցը, մարդկանց արգելվում է մտնել Թաքսիմ հրապարակ և Իսթիքլալ պողոտա:
