Սերգեյ Վենյավսկի, Sputnik.
Ռոստովում եղանակը չի կարգավորվում: Օդերևութաբանական կանխատեսումներն էլ հուսադրող չեն: Թաց ձյանն ուղեկցում է ուժեղ քամին: Օդերևութաբանները հայտնում են, որ եղանակային փոփոխություն կլինի միայն մարտի 20-ից հետո:
Դոնի Ռոստովի օդանավակայանը փակ է բոլոր չվերթերի համար: Ինքնաթիռներն օդ չեն բարձրանա մինչև մարտի 20-ը (կամ նույնիսկ 21-ը), քանի որ հայտնի չէ, թե որքան կտևեն փրկարարական աշխատանքները: Բոլոր թռիչքներն իրականացվում են Կրասնոդարի «Պաշկովսկի» օդանավակայանից:
Օդանավակայանի կայանատեղում շուրջ 30-40 ավտոբուս է հավաքվել, ավտոբուսները պետք է ուղևորներին տեղափոխեն Կրասնոդար: Մեծ ավտոբուսները տեղափոխում են այն ուղևորներին, ովքեր պետք է մեկնեին Ռոստովից: Արդեն Կրասնոդարում ուղևորներից յուրաքանչյուրը կմեկնի իր տոմսում նշված ուղղությամբ: Սա վերաբերում է նաև միջազգային չվերթերին: Բոլոր ավիաընկերությունները փորձելու են օգնել նրանց, ովքեր պետք է մեկնեին Ռոստովի օդանավակայանից:
Օդանավակայանի ղեկավարությունը հայտնել է նաև, որ բոլոր նրանք, ովքեր այսօր կամ վաղը կհրաժարվեն թռիչքից, կարող են վերադարձնել իրենց տոմսերը:
Տոմսի գումարը կվերադարձվի ամբողջությամբ:
Այժմ կարելի է արդեն ասել, որ օդանավակայանում իրավիճակը մի փոքր հանդարտվել է, լարվածությունն էլ՝ թուլացել: Փրկարարներ են գալիս Վոլգոգրադի, Կրասնոդարի ու Ստավրոպոլի երկրամասերից: Մեքենաների հոսքը չի դադարում:
Փրկարարներից մեկի հետ զրույցում հնարավոր դարձավ պարզել, որ եղանակային անբարենպաստ պայմանները բարդացնում են նրանց աշխատանքը: Կարելի է ենթադրել, որ նրանք կաշխատեն մինչև ուշ երեկո, գուցե նույնիսկ ավելի ուշ:
Օդանավակայանի ղեկավարությունը տեղեկատվական տախտակի վրա փակցրել է զոհված ուղևորների ու անձնակազմի անդամների ցուցակը, որում 62 անուն է նշված: Զոհվածների թվում նաև Ուկրաինայի, Ուզբեկստանի քաղաքացիներ կան, մեկն էլ Հնդկաստանի քաղաքացի է:
Հոգեբաններն ու բժիշկներն աշխատում են զոհվածների հարազատների հետ: Նրանց հետ են զրուցում նաև Ռոստովի մարզպետարանի ներկայացուցիչները: Նրանք հարցումներ են անցկացնում, որպեսզի զոհվածների հարազատներին փոխանցեն հասանելիք գումարները:
Փոխհատուցման գումարը դեռ որոշված չէ: Վճարումները հատկացվելու են Ռոստովի մարզի բյուջեից: Ռոստովի մարզի ղեկավար Վասիլի Գոլուբևը հանձնարարել է շրջանային էկոնոմիկայի նախարարությանն ու այլ համապատասխան գերատեսչություններին ամեն ինչ հաշվարկել, որպեսզի ոչ մեկն առանց փոխհատուցման չմնա:
Օտարերկրյա քաղաքացիներին փոխհատուցում վճարելու մասին դեռ ոչինչ հայտնի չէ: Աղետի վայրում են գտնվում ՌԴ ԱԳՆ ու օտարերկրյա պետությունների հյուպատոսությունների ներկայացուցիչները:
