ԵՐԵՎԱՆ, 19 մարտի — Sputnik. Այսօր առավոտյան ահաբեկչական պայթյունը ցնցեց Ստամբուլը: Դեպքը տեղի ունեցավ քաղաքի կենտրոնական փողոցներից մեկում՝ Պալոյում, որտեղ քաղաքի սիրտն է բաբախում, ռադիոկայանի եթերում պատմեց Նաիրա Մկրտչյանը:
«Բարեբախտաբար վաղ առավոտ էր, և շատ մարդ չկար փողոցում: Պայթյունը որոտաց «Մարմարայի» խմբագրատնից 100-150 մետրի վրա: Մեր խմբագրության շենքն էլ ցնցվեց: Ոմանք դուրս եկան և տեսան, որ մահապարտ է պայթեցրել իրեն, և ամենուրեք վիրավորներ են ու զոհվածներ»,- ասաց նա:
«Մարմարայի» լրագրողը հայտնեց, որ Թուրքիայի իշխանությունն այժմ լրատվության տարածման արգելք է սահմանել, որպեսզի ժողովրդի մոտ խուճապ չսկսվի:
«Մեր տեսածով և ակնաատեսների պատմելով ՝ 7 հոգի մահացել է, 25 վիրավոր կա, որոնցից երեքի վիճակը ծայրահեղ ծանր է»,- ասաց Նաիրա Մկրտչյանը:
Ստամբուլի կենտրոնը դատարկվել է, որովհետև ոստիկանները շրջափակել են փողոցը, մարդկանց արգելվում է մտնել Թաքսիմ հրապարակ և Իսթիքլալ պողոտա:
