ԵՐԵՎԱՆ, 19 մարտի — Sputnik. Լաուրան Դուբայից Դոնի Ռոստով մեկնող Boeing 737-800 ինքնաթիռի կործանման մասին շատերի պես իմացել է վաղ առավոտյան, երբ միացրել է հեռուստացույցը:
«Առավոտյան շուտ հեռուստացույցով դիտեցինք լուրերն ու իմացանք, որ նման աղետալի դեպք է պատահել: Իհարկե, բոլորս ցավում ենք: Իմ թռիչքը, որը վաղն առավոտյան պետք է լիներ, նույնպես հետաձգվել է: Հայտարարեցին, որ այստեղ թռիչք չի լինելու ամբողջ օրը, մինչև սև արկղերը գտնեն, բայց սև արկղերն արդեն գտել են»,- ասաց Լաուրան:
Նա նշեց, որ արդեն մի քանի օր է՝ Դոնի Ռոստովում ուժեղ քամի է, և նույնիսկ հայտարարել էին, թե հնարավոր է՝ մարդկանց տեղափոխեն Կրասնոդար, և մարդիկ այնտեղից օդանավ նստեն:
«Երեկ շատ սարսափելի քամի էր, որը շարունակվեց մինչև վաղ առավոտ: Իսկ այսօր ձյուն է, քամի, շատ վատ եղանակ է: Չեմ կարծում, որ հնարավոր կլինի նույնիսկ Կրասնոդար հասնել»,- ասաց Լաուրան:
Նրա խոսքով՝ մարդկանց մեծ ցավ է պատճառել ինքնաթիռի կործանման լուրը, ոմանք գնում են օդանավակայան ու ծաղիկներ դնում այնտեղ:
Լաուրայի ծանոթներից որևէ մեկը չի եղել օդանավում, բայց միևնույն է՝ աղետի լուրը հուզել ու ցավ է պատճառել նաև նրան:
Դուբայից Դոնի Ռոստով մեկնող Boeing 738 ինքնաթիռը կործանվել է Դոնի Ռոստովի օդանավակայանում վայրէջք կատարելիս: Ինքնաթիռի անձնակազմն ու բոլոր ուղևորները զոհվել են: Օդանավում եղել է 62 մարդ՝ 7 հոգանոց անձնակազմն ու 55 ուղևոր:
