ԵՐԵՎԱՆ, 19 մարտի — Sputnik. Դուբայից Դոնի Ռոստով մեկնող Boeing ինքնաթիռը կործանվել է Դոնի Ռոստովի օդանավակայանում վայրէջք կատարելու ժամանակ: Ինքնաթիռի անձնակազմն ու բոլոր ուղևորները զոհվել են: Ավիացիոն փորձագետ Դմիտրի Ադբաշյանի համար անհասկանալի է, թե Fly Dubai ավիաընկերությանը պատկանող Boeing 737-800 ուղևորատար ինքնաթիռն ինչու է թռիչքը շարունակել ուժեղ քամու պայմաններում: Սա այն դեպքում, երբ նույն օրը մի շարք ինքնաթիռներ ուղղվել են դեպի Կրասնոդարի պահեստային թռիչքուղի:
«Գուցե օդաչուն էր ոչ շատ հմուտ կամ էլ եղանակային պայմաններն են խաբուսիկ եղել: Օրինակ՝ թռիչքի տևողությունը 4 ժամ է, գուցե մտածել են, որ ընթացքում եղանակը կլավանա, բայց եղել է հակառակը: Այս պահին ոչ մի հստակ բան ասել չեմ կարող»,-ասաց Դմիտրի Ադբաշյանը:
Փորձագետի խոսքով՝ օդանավն ունի մինիմալ արագություն, որը չպահպանելու դեպքում արագությունն ընկնում է: Առհասարակ օդանավի արագություն ապահովում է քամին: Մասնագետն ասում է, որ եթե քամին պատահաբար շրջվի հակառակ կողմ, օդանավի հավասարակշությունը կխախտվի: Այդ դեպքում օդաչուին օգնության է գալիս պրոֆեսիոնալիզմը:
Միջազգային լրատվամիջոցներին տված հարցազրույյցներում որոշ փորձագետներ էլ ասել են, որ օդանավի հրամանատարը Դուբայից էր և գուցե այնքան էլ սովոր չէր ռուսաստանյան եղանակային պայմաններին:
Դուբայից Դոնի Ռոստով մեկնող Boeing ինքնաթիռը կործանվել է շաբաթ օրը, վաղ առավոտյան, Երևանի ժամանակով 04:40-ին: Ինքնաթիռը բախվել է գետնին և մի քանի մասի բաժանվել: Ինքնաթիռի 7 հոգանոց անձնակազմն ու բոլոր ուղևորները (55 մարդ) զոհվել են:
