ԵՐԵՎԱՆ, 19 մարտի — Sputnik. Ուղևորատար Boeing-ը կործանվել է վատ տեսանելիության պատճառով: Ինքնաթիռում եղել է անձնակազմի 7 անդամ և 55 ուղևոր, նրանց թվում՝ 4 երեխա:
Նախնական տվյալով՝ ողբերգությունը տեղի է ունեցել շաբաթ օրը, վաղ առավոտյան, Երևանի ժամանակով 04:40-ին: Ինքնաթիռը բախվել է գետնին և մի քանի մասի բաժանվել: ԶԼՄ-ների տվյալով՝ ինքնաթիռի օդաչուն Դոնի Ռոստովում վայրէջք կատարելուց առաջ մի քանի անգամ հայտնել է, որ պատրաստվում է վայրէջք կատարել:
Նախնական տվյալով՝ զոհվածների մեծ մասը Ռուսաստանի Դաշնության քաղաքացիներ են, անձնակազմի անդամները՝ արտասահմանցիներ: ՌԴ ԱԻՆ-ը հայտնել է, որ ուղևորների թվում երեք օտարերկրացի է եղել, տեղեկությունը դեռ ճշտվում է:
Դոնի Ռոստովի օդանավակայանն այժմ փակ է: Աշխատանքը կվերականգնվի մեկ օրից, հայտնել է Դոնի Ռոստովի նահանգապետ Վասիլի Գոլուբևը: Դեպքի վայր են ժամանել ՌԴ տրանսպորտի նախարարն ու Ռոսավիացիայի ղեկավարը:
ՌԴ ԱԻՆ ղեկավար Վլադիմիր Պուչկովը հանձնարարել է հասցեական օգնություն կազմակերպել զոհվածների ընտանիքների համար:
«Մենք սերտորեն կաշխատենք բոլոր գերատեսչությունների հետ, պարբերաբար թարմացված տեղեկություններ կտրամադրենք»,- հայտարարել է Flydubai ավիաընկերությունը:
