ԵՐԵՎԱՆ, 18 մարտի —Sputnik. ՀՀ ԶՈւ-ն պատրաստ է պահպանել հրադադարը ՀՀ սահմաններում, եթե ադրբեջանական ԶՈւ-ն ևս դրական արձագանքի ԵԱՀԿ ներկայացուցչի կոչին, ասված է ՀՀ պաշտպանության նախարարության տարածած հայտարարության մեջ։
«Արձագանքելով ԵԱՀԿ գործող նախագահի անձնական ներկայացուցչի կոչին հայտարարում ենք, որ ՀՀ ԶՈւ-ն պատրաստ են խստորեն պահպանել հրադադար ՀՀ սահմաններում և չեն ձեռնարկի որևէ քայլ, որը կարող է հանգեցնել զինված դիմակայության լարվածության աճին՝ մի պայմանով, եթե Ադրբեջանական ԶՈւ-ն ևս դրական կարձագանքեն վերոհիշյալ կոչին»:
ԵԱՀԿ գործող նախագահի անձնական ներկայացուցիչ Անջեյ Կասպրշիկը մարտի 17-ին իր մանդատի շրջանակում դիտարկում էր իրականացրել Հայաստանի ու Ադրբեջանի միջև սահմանին և հանդես եկել հայտարարությամբ՝ կոչ անելով կողմերին առաջիկա կրոնական տոներին զերծ մնալ զինադադարը խախտելու դեպքերից։
