ԵՐԵՎԱՆ, 18 մարտի — Sputnik. Ավետիսյանների ընտանիքի սպանության գործով մարտի 18-ին կայացած դատական նիստի ժամանակ հրապարակվեցին Ավետիսյանների ընտանիքի սպանության մեջ մեղադրվող Վալերի Պերմյակովի և հունվարի 12-ին (Ավետիսյանների ընտանիքի սպանության օրը) նրա հետ ծառայություն իրականացրած զինվորների դատաբժշկական փորձաքննության արդյունքները։
Համաձայն այդ եզրահանգման` ինչպես Պերմյակովը, այնպես էլ նրա ծառայակիցները ալկոհոլի կամ թմրամիջոցի ազդեցության տակ չեն եղել։
Փաստաթղթերի ընթերցման ընթացքում ներկայացվեց նաև Ավետիսյանների տանը հայտնաբերված իրերի, փամփուշտների, արյան և քրտինքի վերաբերյալ փորձաքննական եզրակացությունները, ինչպես նաև` դիակների դատաբժշկական հետազոտման արդյունքները։
Վերջին արդյունքներով` Ավետիսյանների ընտանիքի բոլոր անդամները, բացառությամբ փոքրիկ Սերյոժա Ավետիսյանի, զոհվել են հրազենից ստացած վնասվածքներից։
Ի դեպ, մարտի 11-ին կայացած նախորդ դատական նիստն ընդմիջվել էր Պերմյակովի ինքնագոյացության վատացման պատճառով, նա այս ընթացքում բուժզննման է ենթարկվել և այսօր դատարանում հայտարարեց, որ իրեն լավ է զգում։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
