ԵՐԵՎԱՆ, 18 մարտի —Sputnik. ՀԱԿ-ը հանդես էր եկել Ընտրական օրենսգրքի փոփոխությունների շուրջ միասնական պլատֆորմ կազմելու առաջարկությամբ: ԱԺ ՀԱԿ ղեկավար Լևոն Զուրաբյանն այսօր լրագրողների հետ հանդիպմանը հայտնեց, որ քաղաքական ու քաղաքացիական ուժերի հետ հանդիպումներն այս թեմայով շարունակվում են, պլատֆորմը դեռ ձևավորված չէ, համագործակցության որևէ փաստաթուղթ չի ստորագրվել, բայց քաղաքական որոշ ուժերի միջև կոնսենսուս արդեն կա, մնում է համաձայնեցնեն դետալները:
«Մեր տպավորությամբ Ժառանգությունն էլ է այդտեղ, ՕԵԿ-ն էլ, Էդմոն Մարուքյանի կուսակցությունը, Ազատ դեմոկրատները և տասնյակ հասարակական կազմակերպություններ»,- ասաց Զուրաբյանը:
ՕԵԿ խմբակցության պատգամավոր Հովհաննես Մարգարյանը հաստատեց՝ ՕԵԿ-ը միացել է ՀԱԿ-ի առաջարկած պլատֆորմին՝ ԸՕ-ի իշխանության ներկայացրած տարբերակում միասնաբար առաջարկելով 5 փոփոխություն՝ հրապարակել ընտրողների ստորագրած ցուցակները, ցուցակներից հանել երկրից բացակայող ընտրողներին, նկարահանել ընտրությունների ընթացքը և ցուցադրել ուղիղ եթերում, ընտրություններն իրականացնել միայն մեկ տեսակի անձը հաստատող փաստաթղթով, ընտրության արդյունքներն ամփոփել ԸԸՀ-ներում:
«Ժառանգությունը» ևս միացել է պլատֆորմին, բայց այն մեկնաբանությամբ, որ ոչ թե ինքն է միացել ՀԱԿ-ի նախաձեռնությանը, այլ ՀԱԿ-ն՝ իրենց:
«1995թ-ի ավտորիտար ռեժիմի կնքահայրը եղել է Լևոն Տեր-Պետրոսյանը: Դեռ իրենք ավտորիտար ռեժիմի մեջ էին, մենք էլի ընդդիմություն էինք և ասում էինք, որ չպիտի գնանք այս ճանապարհով: Միանալու խնդիր չունենք սա մեր առաջարկներն են, կարելի է ասել, իրենք են մեզ միացել»,- այսօր ԱԺ-ում լրագրողների հետ ճեպազրույցում ասաց ԱԺ «Ժառանգություն» խմբակցության պատգամավոր Զարուհի Փոստանջյանը:
ՀԱԿ-ը պլատֆորմին միանալու առաջարկով դիմել է նաև ԲՀԿ-ին: Ու, թեև ՀԱԿ-ի ներկայացրած առաջարկները, ԲՀԿ-ի համար ընդունելի են, բայց կուսակցությունը որոշել է մերժել ՀԱԿ-ին:
«Ունենալով նախկին փորձը՝ ԲՀԿ-ն որոշել է գոնե տեսանելի ապագայում որևէ երկյակ, եռյակ, քառյակ, գործողությունները որոշակիորեն սահմանափակող, կաշկանդող, ինչ-ինչ պայմանավորվածություններ պարտադրող որևէ ֆորմատով հանդես չգալ»,- ասաց ԲՀԿ նախագահը՝ միաժամանակ հայտնելով, որ ԸՕ-ի 30 կետից բաղկացած առաջարկները գրավոր կերպով ներկայացնելու են հենց իրենց խմբակցության անունից:
