ԵՐԵՎԱՆ, 18 մարտի- Sputnik. 60 րոպե առանց էլեկտրաէներգիայի կամ ինչպես օգնել բնությանը` մարդու հասցրած վնասից փրկվելու համար. հենց այս նպատակին է ուղղված «Երկրի ժամը» նախաձեռնությունը, որի շրջանակում ողջ աշխարհում ավելի քան 2 մլրդ մարդ 60 րոպեով անջատում է էլեկտրաէներգիան։
Հայաստանը նույնպես կմասնակցի «Երկրի ժամը» ակցիային։ Վաղը 60 րոպեով առանց էլեկտրաէներգիայի կմնան երկրի փողոցները, կանջատվի տեսարժան վայրերի լուսավորությունը։ Փաստորեն Երևանը կընկղմվի խավարի մեջ, և այդ ֆոնին շատ ավելի վառ կկընդգծվեն հեծանվավազքի դուրս եկած մարդկանց հեծանիվների լույսերը։
Ավելի քան 100 մարդ, որոնց շարքում` դեսպաններ, խորհրդարանականներ, հասարակական գործիչներ, ակտիվիստներ և հասարակ քաղաքացիներ, կմասնակցեն հեծանվավազքին։
«Այդ մեկ ժամվա ընթացքում գլոբալ ոչինչ չի փոխվի, բայց դա թույլ կտա փոխել մարդկանց գիտակցությունը։ Վաղը 20։30-21։30-ին մենք բնակչությանը կծանուցենք այն մասին, որ պետք է մտածել բնության մասին և պահպանել այն։ Կոչ եմ անում խնայողաբար օգտագործել էլեկտրաէներգիան և հնարավորին չափ քիչ օգտվել ավտոմեքենայից»,- լրագրողների հետ հանդիպման ժամանակ ասաց Հայաստանում WWF-ի մասնաճյուղի տնօրեն Կարեն Մանվելյանը։
Առաջին անգամ էլեկտրականությունը մեկ ժամով անջատելու գաղափարն իրագործվել է 2007թ.-ին Սիդնեյում (Ավստրալիա)։ Ակցիայի հեղինակը WWF-ն էր։ Հայաստանն այդ նախաձեռնության մասնակից է դարձել 2009թ.-ին։
Հայտնի է, որը մարդը կործանարար ազդեցություն է ունենում բնության վրա, և դրա հետևանքները կատակլիզմների ձևով բացասական ազդեցություն են ունենում մարդու վրա։ Էլեկտրաէներգիայի անխնա օգտագործումը ոչ միայն ազդում է սակագնի վրա, այլ նաև բացասաբար է անդրադառնում բնության և կլիմայի վրա։ Կլիմայի փոփոխությունն էլ իր հերթին ազդում է գյուղատնտեսության, էներգետիկայի և այլ ոլորտների վրա։
«Եթե մենք վաղը բոլորս միասին 60 րոպեով անջատենք էլեկտրաէներգիան, ապա մեր այդ քայլով ուղերձ կհղենք աշխարհին»,- ասաց էներգետիկայի և բնական պաշարների փոխնախարար Հայկ Հարությունյանը։ Նա կոչ արեց խնայողաբար օգտագործել էլեկտրականությունը` նշելով, որ էլեկտրաէներգիայի ռեկորդային օրական կիրառում է գրանցվել է 2013թ.-ի դեկտեմբերի 30-ին ժամը 19։30-ին, երբ հաշվիչն արձանագրել է 1521 ՄգՎտ էներգիա։
Բնակչության շրջանում անցկացվող նման ակցիաներն օգնում են գիտակցել այն փաստը, որ մոլորակը մեր տունն է։
Յուրաքանչյուր երկիր յուրովի է անցկացնում Երկրի ժամը, սակայն բոլորն էլ այդ օրը անջատում են էլեկտրաէներգիան։ Այսպես, 2011թ.-ին առանց հոսանքի են մնացել ողջ աշխարհի հայտնի հուշարձանները, որոնց շարքում են «Էմփայեր սթեյթ բիլդինգը» (Նյու Յորք), «Ոսկե դարպասներ» կամուրջը (Սան Ֆրանցիսկո), Հռոմի Կոլիզեյը, Սիդնեյի Օպերային թատրոնը և այլն։
