ԵՐԵՎԱՆ, 18 մարտի — Sputnik. Դեղերի և բժշկական տեխնոլոգիաների փորձագիտական կենտրոնի ղեկավարների, նախարարության համապատասխան ստորաբաժանումների ղեկավարների հետ հանդիպման ժամանակ կարևորվել է հատկապես կենտրոնացված գնումներով ձեռք բերվող դեղամիջոցների կիրառման ժամանակ հիվանդների վարման ընթացքում կողմնակի ազդեցությունների քարտերի վարումը։
«Պետք է շրջաբերական ուղարկել բուժհաստատություններին, որպեսզի բոլոր կողմնակի ազդեցությունների վերաբերյալ ժամանակին և հաստատված ձևի համաձայն տեղեկացնեն Դեղերի և բժշկական տեխնոլոգիաների փորձագիտական կենտրոնին»,- հանձնարարեց նախարարը։
Արմեն Մուրադյանը միաժամանակ հանձնարարեց Դեղերի փորձագիտական կենտրոնում կլինիկաների մասնագետների մասնակցությամբ ձևավորել խումբ` հավաքագրված տեղեկատվությունը հանգամանալից վերլուծելու նպատակով։
Արմեն Մուրադյանն անդրադարձավ նաև փորձագիտական կենտրոնում ձևավորված դեղատնտեսագիտական բաժնի աշխատանքների ակտիվացման խնդրին։
Հանձնարարեց դեղերի որակը և արդյունավետությունը գնահատելիս առաջնորդվել նաև դեղատնտեսագիտական մշակված մեթոդաբանությամբ։
«Պետք է ձգտենք, որ գոնե սոցիալական հիվանդությունների բուժման նպատակով կենտրոնացված գնումներով ձեռք բերվող դեղերը գրանցելիս ունենանք դրանց դեղատնտեսագիտական վերլուծությունը` արտադրվող կամ այլ երկրում իրականացված մեկ տարվա դիտարկման արդյունքներով»,-ասաց նախարարը` կարևորելով նաև հետգրանցումային շրջանում դեղերի կողմնակի ազդեցությունների մշտադիտարկման համակարգի ուժեղացումը, նոր մոտեցման ձևավորումը։
Նախարարին զեկուցվեց, որ դեղերի կողմնակի ազդեցությունների գրանցման և վերլուծման համակարգն ակտիվացնելու նպատակով կազմակերպվել են բժիշկների երկամսյա դասընթացներ։
