ԵՐԵՎԱՆ, 18 մարտի — Sputnik. Հինգ անձով արդեն մաշված ու քանդված տնակում բնակվող Իզաբելլան ու միայնակ երեք անչափահաս երեխաներին կրկին տնակում մեծացնող Աստղիկ Թադևոսյանն այն երկու երջանիկներից են, ովքեր նախօրեին պատահաբար տեղեկացան, որ տուն են ստանալու։
Այս անգամ «բարի փերու» կարգավիճակում հանդես եկավ Հայաստանի էլեկտրական ցանցեր ընկերությունը. Էլցանցերի սեփականատեր Սամվել Կարապետյանի նախաձեռնությամբ` ընկերության միջոցների հաշվին 10 բնակարան կնվիրվի 10 անօթևան ընտանիքի, ևս 2-ը ձեռք կբերվի ընկերության աշխատակիցների սեփական միջոցների և ևս մեկը` արհմիության շնորհիվ։ 60 միլիոն դրամի շրջանակում 10 բնակարան նվիրաբերելու մասին պայմանագիրը ստորագրվեց «Գյումրին սռանց տնակների հիմնադրամի» հոգաբարձուների խորհրդի անդամների ու ընկերության միջև։
«Չեմ հավատում, որ նոր բնակարան կունենամ։ Անօթևանի կարգավիճակ չունեի, ոչ էլ հույս, որ մի օր տնակի փոխարեն քարե տուն կունենամ»,- հուզված նշեց Իզաբելլա Չիմանյանը։
Նույն վիճակում էր նաև միայնակ մայր Աստղիկ Թադևոսյանը։
«Երկար ձեռքերդ միշտ երկար մնան, Ձեր բարի գործն էլ թող վարակիչ լինի»,- իր խոսքում նշեց հիմնադրամի հոգաբարձուների խորհրդի նախագահ, Շիրակի թեմի առաջնորդ Միքայել եպիսկոպոս Աջապահյանը պայմանագրի ստորագրման ժամանակ։
