Կիրակի նոր ցիկլոն կգա Հայաստան

ԵՐԵՎԱՆ, 18 մարտի — Sputnik. Հայաստանի հովտային գոտիներում, այդ թվում` Արարատյան դաշտում այս գիշեր կրկին գրանցվել են ցրտահարություններ, հաղորդում է ԱԻՆ Հիդրոմետ ծառայությունը։

Օդի նվազագույն ջերմաստիճանը լուսադեմին ունեցել է հետևյալ ցուցանիշները. Արմավիրում` —5, Մերձավանում` —7,5, Արտաշատում` —3, Արարատում —1,5, Ուրցաձորում` —7, Աշտարակում` —5, Երևանում` —3-5, Արենիում` —5, Բագրատաշենում` —4, Իջևանում` —2, Կապանում` —3 աստիճան ցուրտ: Բացառություն է կազմել Մեղրին, որտեղ բացասական ջերմաստիճան չի գրանցվել:

Մարտի 19-ի գիշերը հանրապետության տարածքում անտիցիկլոնի ազդեցությունը կպահպանվի, սակայն կնկատվի ամպամածության որոշակի ավելացում, ինչի հետևանքով օդի ջերմաստիճանը կբարձրանա 2-3 աստիճանով:

Արարատյան դաշտում, Վայոց ձորի, Տավուշի և Սյունիքի հովտային գոտիներում օդում սպասվում է —2-5, հողի մակերևույթին՝ —3-6 աստիճան ցուրտ:

Մարտի 20-ին հանրապետության տարածքին մոտենում է հաջորդ ցիկլոնը, հանրապետության ողջ տարածքում սպասվում են տեղումներ, լեռնային և նախալեռնային գոտիներում կտեղա ձյուն, հովտային գոտիներում՝ անձրև և ձնախառն անձրև, մարտի 21-ին տեղումները կդադարեն:

Մարտի 18-19-ը, 21-ի ցերեկը, 22-ին սպասվում է առանց տեղումների եղանակ, 20-ին, 21-ի գիշերը շրջանների զգալի մասում սպասվում են տեղումներ, լեռնային և նախալեռնային գոտիներում‵ ձյուն:

Քամին կլինի հյուսիս-արևմտյան՝ 2-7 մ/վրկ արագությամբ, 19-20-ը սպասվում է քամու ուժգնացում‵ 15-20 մ/վրկ արագությամբ:

Օդի ջերմաստիճանը 18-ի գիշերը կնվազի ևս 2-4 աստիճանով:
Երևանում մարտի 18-19-ը, 21-ի ցերեկը, 22-ին սպասվում է առանց տեղումների եղանակ: 20-ին, 21-ի գիշերը ժամանակ առ ժամանակ սպասվում են տեղումներ, քամու ուժգնացում‵ 17-19 մ/վրկ:

Այսօր ցերեկը մայրաքաղաքում կլինի 7-9 աստիճան տաքություն, գիշերը` 3-5 աստիճան ցուրտ։