ԵՐԵՎԱՆ, մարտի 18 — Sputnik. ՌԴ Արտակարգ իրավիճակների նախարար Վլադիմիր Պուչկովը ժամանում է Երևան, որտեղ կբացի Ռուս-հայկական մարդասիրական արձագանքման կենտրոն, հայտնում են գերատեսչությունից։
Կենտրոնի բացման հանդիսավոր արարողությանը կմասնակցեն Հայաստանի նախագահ Սերժ Սարգսյանը և արտակարգ իրավիճակների նախարար Արմեն Երիցյանը: Աշխատանքային այցի շրջանակում Ռուսաստանի ԱԻՆ ղեկավարը հանդիպումներ կունենա Հայաստանի նախագահի ու վարչապետի հետ։
«Ռուս-հայկական մարդասիրական արձագանքման կենտրոնը հիմնվել է 2015թ. մայիսի 19-ին` միջկառավարական համաձայնագրի շրջանակում: Կառույցի հիմնական խնդիրներից կլինի լեռնային շրջաններին բնորոշ և երկրաշարժերով, սողանքներով, ձնակույտերով պայմանավորված արտակարգ իրավիճակների վերացման ժամանակ որոնողափրկարարական գործողությունների անցկացումը: Կենտրոնի մասնագետները կզբաղվեն նաև խոշոր հրդեհների մարմամբ, հումանիտար օգնության մատակարարմամբ, ազգային արտակարգ ծառայությունների անձնակազմերի որակավորման բարձրացմամբ»,- տեղեկացնում են նախարարությունից:
Կենտրոնի գլխավոր հատվածը կլինի տեխնիկապես հագեցած իրավիճակային դահլիճը, որտեղ կապ կհաստատվի Ռուսաստանի ԱԻՆ ճգնաժամային իրավիճակների կառավարման ազգային կենտրոնի հետ։ Այստեղ հնարավոր կլինի տեսնել նաև այն անօդաչու թռչող սարքերի լուսանկարած պատկերները, որոնք ներգրավված են ինչպես մոնիտորինգի, այնպես էլ ԱԻ վերացման աշխատանքներում։ Կենտրոնի ամբողջ տեխնիկան համալրված է լինելու Գլոբալ նավիգացիոն արբանյակային համակարգի սարքավորումներով։
ԱԻՆ-ից հայտնեցին, որ ռուս-հայկական կենտրոնը համալրված է լինելու ռուսական արտադրության տեխնիկայով։
«Կենտրոնը կհամալրվի նաև լեռնափրկարարական, վթարային-փրկարարական ավտոմեքենաներով, փլատակների վերացման, սողանքների դեմ պայքարի, արտակարգ իրավիճակներում հայտնված ավտոմեքենաների տարհանման ինժեներական տեխնիկայով», — հայտնել են գերատեսչությունից։
Բացի այդ, բարդ օբյեկտներում սպառնալիքներին հակազդելու համար կենտրոնը կհամալրվի ռուսական ժամանակակից վթարային-փրկարարական սարքավորումների ու ցիստեռների մեծ հավաքածուով, որոնցով անհրաժեշտության դեպքում հնարավոր կլինի խմելու ջուր տեղափոխել։
