ԵՐԵՎԱՆ, 18 մարտի — Sputnik. Մոսկվայում ընթացող շախմատի աշխարհի չեմպիոնի հավակնորդների մրցաշարի 6-րդ տուրում հայ գրոսմայստեր Լևոն Արոնյանը նախօրեին երեկոյան հաղթեց ԱՄՆ-ն ներկայացնող Հիկարու Նակամուրային
Արոնյանը խաղաց սպիտակներով և Նակամուրային պարտության մատնեց 83-րդ քայլում: Արոնյանը 4 միավորով հավասարվեց ռուսաստանցի Սերգեյ Կարյակինին:
Մյուս պարտիաներում աշխարհի նախկին չեմպիոն, հնդիկ Վիշվանաթան Անանդը պարտության մատնեց ռուսաստանցի Պյոտր Սվիդլերին, ամերիկացի Ֆաբիանո Կարուանան ու ռուսաստանցի Սերգեյ Կարյակինը, ինչպես նաև բուլղարացի Վեսելին Տոպալովն ու հոլանդացի Անիշ Գիրին կիսեցին միավորը:
Հիշեցնենք, որ նախորդ տուրերում հայկական շախմատի առաջատարը ոչ-ոքի է խաղացել հոլանդացի Անիշ Գիրիի, հնդիկ Վիշվանաթան Անանդի, ռուս Պյոտր Սվիդլերի ու Ֆաբիանո Կարուանայի հետ, նաև հաղթել էր բուլղարացի Վեսելին Տոպալովին:
Մարտի 18-ին հավակնորդների մրցաշարում հանգստյան օր է: Մարտի 19-ին կայանալիք 7-րդ տուրում Արոնյանը սևերով կմրցի Կարյակինի հետ: Կկայանան նաև Սվիդլեր — Կարուանա, Նակամուրա — Տոպալով և Գիրի — Անանդ պարտիաները:
