ԵՐԵՎԱՆ, 17 մարտի — Sputnik. Անհրաժեշտ է փորձել փրկել ծառերը, սակայն ամեն ինչ պետք է արվի ճիշտ ժամանակին ու ճիշտ ձևով, նշեց փոխնախարարը։ Նրա խոսքով` անհրաժեշտ է ծխահարումը սկսել այն ժամանակ, երբ ջերմաստիճանը կտրուկ սկսում է նվազել, ինչը սովորաբար տեղի է ունենում գիշերվա երկրորդ կեսին` ժամը 3-ից հետո։ Պետք է հետևել ջերմաստիճանին, որ երբ այն մոտենա 0-ին, անմիջապես ծխեցնել։
«Հաճախ մարդիկ ծխահարում են երեկոյան ժամերին, նույնիսկ` օրվա երկրորդ հատվածում, երբ դրա կարիքը բացարձակապես չկա, ավելորդ է։ Պետք է ճիշտ պատրաստել, ճիշտ տեղադրել, որպեսզի քամին ամբողջությամբ այդ ծուխը տեղափոխի այգի և ծխածածկույթով ծածկի ամբողջ տարածքը»,- ասաց նա։
Նա խորհուրդ տվեց ծխակույտերը պատրաստել մեկ-մեկուկես մետր լայնությամբ և 80 սմ-ից մինչև 1 մ բարձրությամբ։ Ստորին հատվածում պետք է տեղադրել ավելի դյուրավառ նյութեր, իսկ վերևում` ավելի խոնավ բուսական մնացորդներ, կարելի է հողով ծածկել, թույլ չտալ, որ բոցավառվի, կարևորը` որ ծուխ առաջանա։
«Պետք է պատրաստել ոչ թե մեկ ծխակույտ, այլ տասնյակ ծխակույտեր և այգու այն հատվածում, որտեղ քամիների գերիշխող ուղղությունն է` քամուն դեմ առ դեմ, քամու ուղղությամբ, որպեսզի ծուխը քամու միջոցով տեղափոխվի այգի և այգին ծածկի ծխածածկույթով»,- նշեց նա։
Պետրոսյանը խորհուրդ տվեց, որպեսզի հարևան այգեգործները բոլորը միասին այդ գործողություններն իրականացնեն` ամբողջ տարածքը ծխածածկելու համար։
Ինչ վերաբերում է ջերմոցներին, ապա դրանք կարելի է լրացուցիչ ծածկոցով պատել կամ դրանց մեջ ջեռուցում ապահովել` դրական ջերմաստիճան ապահովելով։
Նա հայտնեց, որ այսօրվա դրությամբ դեռևս ծիրանենու բերքի առանձնապես մեծ կորուստներ չեն գրանցվել։ Սակայն զգոնությունը չպետք է կորցնել, քանի որ շատ ցուրտ է լինելու մարտի 17-ի լույս 18-ի գիշերը։
Նշենք, որ այսօր կառավարության նիստում ՀՀ գյուղատնտեսության նախարար Սերգո Կարապետյանը հայտնեց, որ հիմնականում ցրտահարություններ եղել են Մերձավանի և Զվարթնոցի տարածքներում։
Նախարարի զեկույցի համաձայն` Բաղրամյան գյուղում, Վայոց ձորի բարձրադիր գոտիներում, Կոտայքի մարզում ցրտահարություն չլինել չի կարող, որովհետև ծիրանենին դեռ չի ծաղկել։
