ԵՐԵՎԱՆ, 17 մարտի — Sputnik. ՀՀԿ պատգամավոր Սամվել Ալեքսանյանը ՀԱԿ-ի իր գործընկեր Նիկոլ Փաշինյանին առաջարկել է միանալ շաքարի իր բիզնեսին։
Սամվել Ալեքսանյանը, ով նաև Ախուրյանի շաքարի գործարանի սեփականատերն է, կատակով Փաշինյանին առաջարկել է համագործակցել իր գործարանի համար շաքարի ճակնդեղ աճեցնելու հարցում` ասելով, որ «չի հասցնում» մենակ անել այդ գործը։
Հայկական օրենսդրության համաձայն` պատգամավորներն իրավունք չունեն ձեռնարկատիրությամբ զբաղվել, սակայն Ալեքսանյանին դա չի կաշկանդում։
Ավելի վաղ Փաշինյանը Ալեքսանյանին մեղադրել էր այն բանում, որ վերջինը չի զարգացնում արտադրությունը, այլ քողարկվում է գործարանով, որպեսզի չվճարի շաքարի ներկրման համար։
«Նիկոլ Փաշինյանը փորձում է ցույց տալ, որ ինքը մեզ հետ չէ։ Սա է նրա հիմնական նպատակը, ոչ թե մտահոգությունը շաքարի ճակնդեղի աճեցման համար», — ասաց Ալեքսանյանը։
Այս կապակցությամբ նա Փաշինյանին առաջարկ արեց, որից «նա հրաժարվել չի կարող»` զբաղվել ճակնդեղի աճեցմամբ, քանի որ միայնակ դա անել չի հասցնում։
Ալեքսանյանը պնդում է, որ սեփական արտադրության գործարկման համար մասնագետներ ու ժամանակ է հարկավոր։ Սակայն շաքարի ներկրմամբ էլ, նրա խոսքով, իրենք չեն զբաղվում։ Իրենք հումք են ներկրում Բրազիլիայից, որը վերամշակելուց հետո շաքար է դառնում ու հայտնվում հայկական շուկայում։
ՀՀԿ պատգամավորը պնդում է, որ Փաշինյանի հայտարարության իմաստն այն է, որ մոտակա խորհրդարանական ընտրությունների հետ կապված` ցույց տա սեփական «ընդդիմադիր լինելը», սակայն իրականում նա իրենց «եղբայրն է»։
