ԵՐԵՎԱՆ, 17 մարտի- Sputnik. ԼՂՀ Մատաղիսի զորամասի նախկին զինծառայողներ Արայիկ Զալյանը, Մուսա Սերոբյանը և Ռազմիկ Սարգսյանը 11 տարի առաջ Եվրոպական դատարան ներկայացրած հայցով իրենց նկատմամբ անմարդկային վերաբերմունքի և ազատությունից ապօրինի զրկելու մասին փաստեր էին ներկայացրել:
Ըստ ՄԻԵԴ ներկայացված հայցի` 2003թ-ին ԼՂՀ Մատաղիսի զորամասում տեղի ունեցած 2 զինծառայողների սպանության գործով նրանց 3 ծառայակիցները՝ Արայիկ Զալյանը, Մուսա Սերոբյանը և Ռազմիկ Սարգսյանը, հրավիրվել են զորամասի հրամանատարի աշխատասենյակ, որտեղ ծեծի են ենթարկվել իրավապահների ու զորամասի սպաների կողմից, ովքեր փորձել են նրանցից սպանության կեղծ խոստովանություն կորզել:
Ավելի ուշ նրանց տեղափոխել են զինդատախազություն և ռազմական ոստիկանություն, որտեղ հարցաքննության ժամանակ դաժան վերաբերմունքը շարունակվել է, նրանց թույլ չեն տվել ուտել և քնել, սպառնացել են վնասել ընտանիքի անդամներին: Իսկ մի պետական մարմնից մյուսը տեղափոխվել են աչքերն ու ձեռքերը կապած:
2004թ-ի ապրիլին Ռազմիկ Սարգսյանն, այլևս չդիմանալով խոշտանգումներին, խոստովանել է չկատարած հանցանքը: Այս ցուցմունքի հիման վրա էլ նրանց մեղադրանք է առաջադրվել, և 2005 թվականի մայիսին զինվորական դատարանի վճռով դատապարտվել են 15 տարվա ազատազրկման:
Վերաքննիչ դատարանը հետագայում էլ ավելի է խստացրել պատիժը՝ այն փոխարինելով ցմահ ազատազրկմամբ:
Վճռաբեկ դատարանը 2006թ-ի դեկտեմբերին ՝ սպանված զինվորներից մեկի հոր դիմումի հիման վրա, ով պնդում էր, որ դատավարությունն իրականցվել է ընթացակարգային խախտումներով, ինչի արդյունքում երեք անմեղ զինծառայող է դատապարտվել, կարճել է վարույթն ու գործն ուղարկել լրացուցիչ քննության: Լրացուցիչ քննության ժամանակ երեք զինծառայողներին ներկայացված մեղադրանքը հանվել է, նրանք ազատ են արձակվել: Իսկ իրական մեղավորներն այդպես էլ չեն հայտնաբերվել:
Այսպիսով` քննելով շուրջ 11 տարի առաջ ստացված գանգատը, ՄԻԵԴ-ն իր վճռով փաստել է, որ թեև ձերբակալված, այնուհետև կալանավորված զինծառայողների նկատմամբ բռնության կիրառման փաստը բացակայում է, բայց դրա փոխարեն ապացուցված է, որ հայաստանյան օրենսդրության պահանջներին հակառակ` զինծառայողները ձերբակալվածի կարգավիճակով պահվել են ավելի քան 3 օր, խոշտանգումների և բռնության մասին փաստաբանի դիմումներն իրավապահների կողմից անհետևանք են մնացել, նրանց նկատմամբ բժշկական փորձաքննություն չի իրականացվել:
ՄԻԵԴ-ն այսօրվա վճռով ՀՀ-ին պարտավորեցրել է որպես ոչ նյութական վնասի փոխհատուցում Արայիկ Զալյանին վճարել 20 հազար, Մուսա Սերոբյանին ու Ռազմիկ Սարգսյանին՝ 15 հազար եվրո:
