ԵՐԵՎԱՆ, 17 մարտի — Sputnik. ՀՀ-ում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն արդեն ավելի քան մեկ տարի Հայաստանում է: Հայկական խոհանոցին հասցրել է ծանոթանալ, բայց խաշ և տնական օղի չի փորձել, քանի որ թունդ ալկոհոլ և յուղոտ ուտեստներ չի օգտագործում: Իսկ հայկական խոհանոցի այլ կերակրատեսակները շատ է հավանել։
«Շատ եմ սիրում հայկական խոհանոցը: Մի քանի կերակրատեսակներ կան, որ ես շատ եմ սիրում, բայց չգիտեմ ինչու առաջին հերթին տալիս եմ թանապուրի անունը: Շատ եմ սիրում նաև հայկական խոհանոցի միսը խորովելու տեխնիկան»,- պատասխանելով Sputnik Արմենիայի հարցին՝ ասաց դեսպան Շարպանտիեն:
Դիվանագետը նաև խոստովանեց, որ ցանկանում է էլ ավելի մոտիկից ծանոթանալ հայկական ավանդական խոհանոցին, բացահայտել նրա ամենախորը գաղտնիքները:
«Հուսամ` առաջիկա ամիսներին առիթ կունենամ լինել ամենահեռավոր բնակավայրերում, որտեղ կհամտեսեմ հայ տատիկների պատրաստած հայկական ավանդական կերակրատեսակները։ Հայկական խոհանոցը դեռ շատ գաղտնիքներ ունի, որ կարող է տրամադրել աշխարհին: Օրինակ՝ հայկական ավանդական լավաշն այսօր արդեն սկսում է մեծ ժողովրդականություն վայելել եվրոպական խոհանոցներում»,- ասաց նա:
Իսկ հայաստանյան ռեստորաններից մեկի ավագ խոհարար շվեյցարացի Ռոլֆ Գրաբերին հայկական խոհանոցում ամենից շատը հաճելիորեն զարմացրել է ռեժանը՝ կաթնասերը:
Ինչ վերաբերում է ֆրանսիական խոհանոցին, դեսպան Ժան Ֆրանսուա Շարպանտիեն խոստովանում է, որ նույնիսկ հայրենի խոհանոցում կան բաներ, որ երբեք չի փորձել, օրինակ՝ ուղեղը, որը ֆրանսիացիները շատ են սիրում: Չի սիրում նաև ֆրանսիական խոհանոցում չափազանց շատ կիրառվող քացախը: Բայց շատ է սիրում ֆրանսիական խոհանոցի աշխարհահռչակ գորտի ազդրիկները:
Հայաստանում Ֆրանսիայի դեսպանի և մի քանի ռեստորանների ավագ խոհարարների հետ զրույցի առիթը մարտի 21-27-ը Հայաստանում ֆրանսիական խոհանոցին նվիրված «Ֆրանսիայի համը» միջոցառումն է: Այն մեր երկրում արդեն երկրորդ տարին է անցկացվում: Մարտի 21-ին, գարնանային գիշերահավասարի օրը, աշխարհի 5 մայրցամաքներում ավելի քան 1500 ռեստորանների ավագ խոհարարներ ներկայացնելու են Ֆրանսիական խոհարարական արվեստը:
Հայաստանում միջոցառմանը միացել է 7 ռեստորան, որտեղ մեկ շաբաթ շարունակ հաճախորդներին են ներկայացվելու հատուկ ֆրանսիական ուտեստներ:
Հենց սկզբից ասենք, որ գորտի տոտիկներ ճաշացանկերում չեն լինելու: Կազմակերպիչները մտավախություն ունեն, որ հայ հասարակությունը պատրաստ չէ դրան: Բացի այդ, Հայաստանում գորտի տոտիկներ գտնելն այնքան էլ հեշտ չէ:
«Երկու հոգի կա ներմուծող: Ներմուծվում է սառեցված վիճակում, իսկ սառեցված մթերքի ներմուծումը շատ բարդ է և ավելի թանկ»,-Sputnik Արմենիայի հետ զրույցում պատմեց Ֆրանսիայի դեսպանատան ավագ խոհարար Նիկոլաս Նատալինին՝ հավելելով, որ Ֆրանսիայում էլ դրանք առանձնապես էժան չեն:
Փոխարենը հայ հաճախորդներին ծրագրի մասնակից ռեստորաններում կառաջարկվի սնկով կամ ճագարի մսով պաշտետ, սիգի խյուս, սոխով տոլմա, ֆրանսիական պանրի ու հայկական մրգերի տեսականի և հայկական ու ֆրանսիական խոհանոցների այլ համեղ խառնուրդներ:
Հարցին, թե ինչու հայ հասարակությանը չի ներկայացվում զուտ ֆրանսիական խոհանոցը, Ֆրանսիայի դեսպանն այսպես պատասխանեց. «Խոհարարությունը, ինչպես լեզուները, արվեստը միմյանց հետ փոխկապակցված են և մշտապես փոխազդվում են միմյանցից»:
«Գյուղական վայրերում, որտեղ անմիջական հարևանությամբ բուծում են կենդանիներ կամ մթերքներ աճեցնում, այսպես թե այնպես նմանություններ կգտնեք: Այստեղ տոլմա կա, Իտալիայում էլ կա աղացած մսով լցոնված լոլիկ, Ֆրանսիան էլ ունի լցոնված ա լա Պրովանսալ լոլիկը: Հատկապես վերջին հարյուր տարվա ընթացքում մարդիկ շատ են ճանապարհորդում, և բնական է, որ խոհանոցները միախառնվել են»,- դեսպանի խոսքը հավելեց ավագ խոհարար Ռոլֆ Գրաբերին:
Դե, իսկ հայ հանրությանը մնում է մարտի 21-27-ն այցելել ռեստորան, համտեսել ու որոշել՝ հայկական խոհանոցն է համեղ, ֆրանսիականը, թե՞ դրանց համադրությունը:
