ԵՐԵՎԱՆ, 17 մարտի- Sputnik. Վառելիքի գներում առկա տարբերությունների հիմնական պատճառները լրագրողներին ներկայացրեց Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Արտակ Շաբոյանը։
«Բենզինի գնում զգալի տարբերություն կա` Վրաստանի համեմատ։ Դա պայմանավորված է 3 գործոնով` Վրաստանի տարածքով վառելիքի փոխադրման բարձր արժեքը, երկրների հարկային տարբեր քաղաքականությունը (Հայաստանում ԱԱՀ-ն և ակցիզային հարկն ավելի բարձր են, քան Վրաստանում), Ադրբեջանից և Թուրքմենստանից էժան բենզին է ներկրվում Վրաստան»,- ասաց Շաբոյանը։
Նրա խոսքով` Հայաստանի անդամակցությունը ԵՏՄ-ին դրական կազդի Հայաստանում բենզինի գների վրա, քանի որ հակառակ դեպքում դրանք կարող էին զգալիորեն բարձր լինել։
Սակայն, Շաբոյանի կարծիքով, դա չի նշանակում, որ ապրանքների գները պետք է կտրուկ նվազեն։ Նա պնդում է, որ հարցը միայն գինը չէ, որով վառելիքը ձեռք է բերվում տնտեսվարող սուբյեկտների կողմից։ Հայաստանում վառելիքի գնագոյացման մեջ կարևոր դեր են խաղում նաև այլ գործոններ։
«Օրինակ` ռուսական ընկերությունները Հայաստանը բենզինի անխափան մատակարարում ապահովելու համար լրացուցիչ ծավալներ են պահում Վրաստանում գտնվող պահեստարաններում»,- նշեց Շաբոյանը։
Նրա խոսքով` խոշոր ընկերությունները, իհարկե, առավելություններ ունեն. մեծ ծավալների շնորհիվ բենզինն ավելի ցածր գնով են ձեռք բերում, ինչպես նաև ավելի քիչ են վճարում տրանսպորտային ծախսերի համար։
Չնայած պատգամավորների բազմաթիվ առարկություններին` Շաբոյանը կարծում է, որ Հայաստանում արգելքներ չկան, որպեսզի նոր ընկերությունները մտնեն վառելիքի շուկա։
Հայկական շուկայում տվյալ պահին գործում է բենզին ներկրող 3 ընկերություն` «Flash»-ը, «CPS»-ը և «Միկա լիմիթեդը», որոնք վառելիք են գնում ռուսական երկու ընկերությունից («Ռոսնավթ Արմենիա», «Լուկօյլ») և բուլղարական մեկ ընկերությունից։
Շաբոյանը նշեց, որ ամենացածր գներն առաջարկում է «Ռոսնավթը» (նրա մասնաբաժինը հայկական շուկայում կազմում է շուրջ 50 տոկոս)։
