ԵՐԵՎԱՆ, 17 մարտի- Sputnik. ԱՄՆ նախագահի թեկնածուների ելույթների վերլուծությունը ցույց է տվել, որ նրանց բառապաշարն ու քերականական գիտելիքներն ավելի շատ համապատասխանում են միջնակարգ դպրոցի աշակերտի մակարդակի, քան` պետության պոտենցիալ ղեկավարի։ Նման հետևության են հանգել Քարնեգի Մելոնի համալսարանի լեզվաբանական տեխնոլոգիաների ինստիտուտի գիտնականները, հաղորդում է ՌԻԱ Նովոստին։
Միաժամանակ ամենավատ ցուցանիշը հանրապետականների թեկնածու, միլիարդատեր Դոնալդ Թրամփինն է։ Մասնագետները կարծում են, որ նրա բառապաշարն ու քերականական գիտելիքները 7-րդ դասարանցու մակարդակի են։
Գիտնականները վարկանիշի առաջատար են անվանել դեմոկրատ Բերնի Սանդերսին, որի ելույթները նման են սովորական ամերիկյան դպրոցի 10-րդ դասարանցու խոսքի։
Երկրորդ տեղում Մարկո Ռուբիոն է, որը նախօրեին հայտարարել է քարոզարշավից դուրս գալու մասին։ Ի դեպ, նրա բառապաշարը գրեթե հավասար է գործող նախագահ, «10-րդ դասարանցի» Բարաք Օբամային։
Դեմոկրատների առաջնորդ Հիլարի Քլինթոնը բառապաշարով առաջ է անցել իր ամուսնուց` նախկին նախագահ Բիլ Քլինթոնից, սակայն պարտվել է ճարտասանության հարցում։
