ԵՐԵՎԱՆ, 17 մարտի — Sputnik. Կառավարությունն ուզում է աշխուժացնել «Երիտասարդ ընտանիքներին մատչելի բնակարան» ծրագիրը, որպեսզի ավելի մեծ թվով մարդիկ ներգրավվեն, այսօր կառավարության նիստում ասաց ՀՀ կառավարության աշխատակազմի ղեկավար-նախարար Դավիթ Հարությունյանը։
«Եթե մինչև հիմա բնակարան ձեռք բերելու թույլատրելի շեմը 16 միլիոն դրամն էր, հիմա այդ շեմը կհասցնենք 25 միլիոնի»,- ասաց նա։
Փոփոխություն է կատարվել նաև երիտասարդ ամուսինների տարիքի հարցում։ Եթե նախկինում «Երիտասարդ ընտանիքներին մատչելի բնակարան» ծրագրից օգտվող ամուսինների տարքիային գումարը չպետք է գերազանցեր 60-ը, ապա այժմ այդ թիվը հասցվել է 65-ի։ Երրորդ կարևոր փոփոխությունն այն է, որ գրավի դեպքում հնարավոր կլինի մուծել բնակարանի գնի 10 տոկոսը։
«Երիտասարդ ընտանիքներին մատչելի բնակարան» ծրագրին աջակցում է Հայաստանի Կենտրոնական բանկը, սոցիալական հարցերի նախարարությունն ու սպորտի և երիտասարդության հարցերի նախարարությունը։
