ԵՐԵՎԱՆ, 16 մարտի — Sputnik. Հայաստանի արդարադատության նախարարությունը կզբաղվի բջջային հեռախոսահամարներին ուղարկած հաղորդագրություններով, ԱԺ-ում կառավարության հարցուպատասխանի ժամանակ ասաց արդարադատության նախարար Արփինե Հովհաննիսյանը։
Այսօր առավոտից Հայաստանի բնակիչները հաղորդագրություն են ստանում այն մասին, որ կարող են Ռուսաստանում աշխատանք գտնել xopan.am կայքի միջոցով։
«Անկեղծ պիտի ասեմ, ես էլ եմ այսօր ստացել այդ հաղորդագրությունը և պակաս զարմացած չեմ, քան դուք: Դա որևէ ձևով կամ որևէ ձևաչափով չի կարող համարվել պետական միջամտություն կամ պետական իմացություն կարող է այստեղ լինել: Ցանկացած անձ իրավասու է ցանկացացած տեղ, որևէ տիրույթում նմանատիպ տեղեկատվություն տեղադրել: Ես մտադիր եմ իմ լիազորությունների շրջանակում նախաձեռնել ուսումնասիրություն, դա հետևյալն է՝ Անձնական տվյալների մասին օրենքում ունենք, որ հեռախոսահամարներին նմանատիպ հաղորդագրություն ուղարկելն իրավաչափ չէ: Մենք համարել ենք, որ բջջային օպերատորների կողմից իրավաչափ չէ նմանատիպ բովանդակությամբ հաղորդագրություն ուղարկելու համար տրամադրել հեռախոսահամարները»,- ասաց նախարարը:
Հարցը ԱԺ-ում բարձրացրեց «Բարգավաճ Հայաստան» խմբակցության ղեկավար Նաիրա Զոհրաբյանը՝ հայտարարելով, որ դա պետական մակարդակով արտագաղթի կոչ է ՀՀ քաղաքացիներին։
Բացի այդ, նա ուշադրություն հրավիրեց այն փաստի վրա, որ կայքում որևէ տեղ նշված չէ, թե ում է պատկանում կայքը։
