ԵՐԵՎԱՆ, 16 մարտի — Sputnik. Հայաստանում ջերմաստիճանի կտրուկ նվազման պատճառով սուր շնչառական վարակների նոր բռնկում է հնարավոր, հայտնում է առողջապահության նախարարության մամուլի ծառայությունը։
«ՀՀ ԱԻՆ «Հիդրոմետ» ծառայության օդերևութաբանության կենտրոնի տեղեկացմամբ` հանրապետության տարածքին Սկանդինավիայի տարածքից մոտենում են արկտիկական ցուրտ օդային զանգվածներ, որի արդյունքում մինչև մարտի վերջ օդի ջերմաստիճանը կնվազի», — ասվում է հաղորդագրության մեջ։
Սուր շնչառական վարակների հնարավոր բարդություններից խուսափելու նպատակով, ինչպես նաև հաշվի առնելով, որ հանրապետությունը դեռևս գտնվում է սուր շնչառական վարակների սեզոնում, ՀՀ առողջապահության նախարարությունը կրկին հիշեցնում և հորդորում է՝ գրիպանման երևույթների արձանագրման դեպքում չզբաղվել ինքնաբուժմամբ և անհապաղ դիմել բժշկական օգնության։
Խորհուրդ է տրվում նաև հաճախակի օդափոխել փակ տարածքները` հետևելով անձնական հիգիենային, գրիպանման երևույթների առաջացման ժամանակ սահմանափակել շփումներն այլ անձանց հետ, մնալ տանը և հետևել բժշկի խորհուրդներին, հագնվել եղանակին համահունչ:
Հայաստանում սուր շնչառական վարակների բռնկում էր գրանցվել հունվարին, ինչի պատճառով դպրոցներում հետաձգվել էին դասերը։
