ԵՐԵՎԱՆ, 16 մարտի — Sputnik. Հայաստանի Ազգային ժողովն առաջին ընթերցմամբ հավանություն տվեց «Ավելացված արժեքի հարկի մասին» օրենքում լրացումներին։
Լրացումների համաձայն` ԵՏՄ երկրներից ավտոմեքենա ներկրող ֆիզիկական անձանցից ԱԱՀ չի գանձվի։ Օրինագծին «կողմ» քվեարկեցին ներկա բոլոր 107 պատգամավորները։
«Այս լրացումները կանխատեսելի էին, ժողովուրդը դրանից միայն կշահի, և շատ սոցիալական հարցեր կլուծվեն», — ասաց ԲՀԿ-ից պատգամավոր Միքայել Մելքումյանը` ներկայացնելով լրացումների նախագիծը։
Նա ևս մեկ անգամ պարզաբանեց, որ այս որոշումը վերաբերում է միայն այն քաղաքացիներին, որոնք տարվա ընթացքում միայն մեկ ավտոմեքենա են ներկրում։
Մյուս պատգամավորները ևս աջակցեցին օրենքում փոփոխություններ կատարելուն, սակայն զարմանում էին, թե ինչու դա ավելի շուտ չի արվել։
«Եթե ԵՏՄ մտնելիս մենք նման փոփոխություն նախատեսել էինք, ապա քաղաքացիներից այս ընթացքում ապօրինի գանձումներ են արվել», — ասաց ՀԱԿ պատգամավոր Նիկոլ Փաշինյանը։
Աջակցելով Շահգելդյանին` նա առաջարկեց վերանայել, օրինակ, գազի ու նավթի հարկերը։
Մելքումյանը պարզաբանեց, որ խոսքը «մեկ քաղաքացի` մեկ ապրանք» բանաձևի մասին է, ինչը չի կարող վերաբերել գազին ու նավթին, որոնք ներկրվում են հետագա վաճառքի համար ու ենթակա են հարկման։
