ԵՐԵՎԱՆ, 16 մարտի — Sputnik. Սնանկ ճանաչված «Էյր Արմենիա» ավիաընկերությունը վերադառնում է. Երևանի Կենտրոն և Նորք Մարաշ վարչական շրջանների ընդհանուր իրավասության դատարանը հաստատել է ավիաընկերության առողջացման ծրագիրը:
Պարտատերերի ժողովի ժամանակ ընկերության ներկայացրած ծրագիրը հավանության է արժանացել, ապա և հաստատվել է դատարանի կողմից, news.am-ին ասել է ավիաընկերության մամուլի խոսնակ Սիրակ Համբարձումյանը:
Նրա խոսքով՝ ընկերությունն առաջին չվերթերը կկատարի ամռանը։ Առաջին հերթին պետք է սերտիֆիկատների ժամկետը երկարացնել ու վերականգնել կոդերը:
«Բիզնես ծրագրերում փոփոխություն է լինելու, քանի որ մեկ այլ հայկական ավիաընկերություն էլ է հայտնվել շուկայում»,- ասաց Սիրակ Համբարձումյանը:
Հիշեցնենք, որ 2015թ. օգոստոսի 12-ին հայկական ավիաընկերությունը հայտարարել էր, որ իր բալանս է մուտք արվել 68 մլն դոլարի արժեթուղթ: Սակայն նոյեմբերի 2-ին Երևանի Կենտրոն և Նորք Մարաշ վարչական շրջանների ընդհանուր իրավասության դատարանը սնանկ էր ճանաչել «Էյր Արմենիային»:
