ԵՐԵՎԱՆ, 14 մարտի – Sputnik. «ՀԱՊԿ-ի շրջանակում ստորագրված համաձայնագրում կարմիր թելի պես անցում է այն միտքը, որ պետք է Լեռնային Ղարաբաղի խնդրի լուծման ուղիներ գտնել ու բոլորին բերել բանակցային սեղանի շուրջ»,- այսօր Երևան-Մոսկվա տեսակապի ընթացքում, պատասխանելով ԼՂ խնդրի կարգավորման և հայ-ադրբեջանական սահմանին տիրող իրավիճակի հարցում ՀԱՊԿ անելիքների մասին Sputnik Արմենիայի հարցին, ասաց ՀԱՊԿ ԽՎ պաշտպանության ու անվտանգության հարցերի մշտական հանձնաժողովի նախագահ, ՌԴ Պետդումայի անվտանգության և կոռուպցիայի հակազդեցության կոմիտեի անդամ Անատոլի Վիբորնին:
Նա նաև հիշեցրեց, որ այդ խնդրով զբաղվում է ԵԱՀԿ ՄԽ-ն, և նպատակահարմար չէ ավելացնել բանակցային գործընթացի մասնակիցների թիվը:
«Թեկուզ վատ խաղաղությամբ, բայց խաղաղ ճանապարհով ընթանանք դեպի նպատակ: Կարևոր է, որ ՀԱՊԿ անդամ բոլոր պետությունները համոզված են՝ միայն խաղաղ ճանապարհով»,-ասաց Անատոլի Վիբորնին:
«Հարավկովկասյան տարածաշրջանն այսօր ամենահագեցածն է ռազմական տեխնիկայով»,-պատասխանելով հարցին՝ ասաց ՀԱՊԿ ԽՎ քաղաքական հարցերի և միջազգային համագործակցության մշտական հանձնաժողովի նախագահ, ՀՀ ԱԺ պատգամավոր Խոսրով Հարությունյանը՝ համոզմունք հայտնելով, որ այս գործընթացը պետք է դադարեցնել:
«Սպառազինությունների այս անիմաստ մրցավազքը պետք է ինչ-որ կերպ դադարեցնել: Սա մեծապես կպարզեցնի նաև մեր պետությունների կոորդինացված գործողությունները»,- ասաց նա:
Կովկասի ինստիտուտի փոխտնօրեն, քաղաքագիտության դոկտոր, քաղաքագետ Սերգեյ Մինասյանն էլ նշեց, որ թեև ՀԱՊԿ-ն ռազմաքաղաքական կառույց է, բայց Հայաստանի նպատակը ոչ թե կառույցը բաց ռազմական հակամարտության մեջ ներքաշելն է, այլ` սպառազինությունների մրցավազքը սահմանափակելը:
