ԵՐԵՎԱՆ, 14 մարտի- Sputnik. «Բարգավաճ Հայաստան» կուսակցության նախկին պատգամավոր Վարդան Օսկանյանը խոսել է իր կողմից ստեղծվող կուսակցության և Հայաստանի երկրորդ նախագահ Ռոբերտ Քոչարյանի մասին։
«Քոչարյանը ոչ մի կապ չունի այս կուսակցության հետ, բայց ես չեմ ցանկանում այնպիսի իրավիճակի մեջ դնել ինձ, երբ ստիպված կլինեմ անընդհատ հեռու մնալ Քոչարյանից, ես նման խնդիր չունեմ»,- ասաց Օսկանյանը լրագրողներին։ Նա նշեց, որ Քոչարյանի նախագահության շրջանում իշխանությունները շատ թերություններ են ունեցել, բայց եղել են նաև հաջողություններ։
«Ես կարծում եմ, որ դա այն շրջանն է եղել, որը ժողովուրդը շատ հարցերում դրական առումով է հիշում»,- ասաց Օսկանյանը։ Նա կոնկրետ անուններ չնշեց, բայց նաև չբացառեց, որ կուսակցության մեջ (որի անունը դեռ որոշված չէ) կարող են ընդգրկվել նաև իր խորհրդարանական գործընկերները։ Օսկանյանը հավաստիացրեց, որ նոր կուսակցությունը պատրաստ կլինի համագործակցել բոլոր կուսակցությունների հետ, այդ թվում` «Բարգավաճ Հայաստանի» և «Հայ ազգային կոնգրեսի»։
