ԵՐԵՎԱՆ, 4 մարտի — Sputnik. Պատգամավոր Կարեն Շահմուրադյանը պատրաստվում է ակտիվ գործունեությամբ զբաղվել, ոչ թե պարզապես «կոճակ սեղմել»։
«Վստահեցնում եմ, որ ակտիվ աշխատելու եմ խորհրդարանում և չեմ պատրաստվում համալրել կոճակ սեղմողների շարքը»,- ասաց Շահմուրադյանը լրագրողներին։
Նա հայտնեց, որ ընդգրկվել է ԱԺ-ի տարածքային կառավարման, կրթության, ինչպես նաև մարդու իրավունքների հարցերի մշտական հանձնաժողովներում։
Շահմուրադյանը տեղեկացրեց, որ ավտոմեքենաների ներմուծմամբ ու վաճառքով զբաղվող «Կարկոմավտո» ընկերությունն էլ փոխանցել է եղբորը։ Օրենքի համաձայն` պատգամավորը չի կարող բիզնեսով զբաղվել։
Նա հերքեց այն լուրերը, թե պատգամավորական աթոռի համար կլոր գումար է վճարել։
«Չեմ հասկանում՝ ո՞վ է տարածում այս լուրերը: Կարդացել եմ` գրված է մեկ միլիոնի մասին: Ինչի՞ համար ես պետք է մեկ միլիոն վճարեմ: Այդ մանդատը, եթե ես գործարար եմ, ինչո՞վ պետք է օգնի ինձ, որ ես բարելավեմ իմ բիզնեսը: Ես ինձ չեմ համարում ոչ հաջողակ բիզնեսմեն, որը կարիք կունենար հայտնվելու պառլամենտում, որ լծակներ ստեղծի ու բարելավվի ոչ լավ կարգավիճակը: Մենք նման խնդիր չունենք»,- ասաց Շահմուրադյանը:
