ԵՐԵՎԱՆ, 14 մարտի — Sputnik. Հայաստանում ՌԴ ԱԴԾ Սահմանային վարչության աշխատակիցները սահմանային ռեժիմը խախտողի են ձերբակալել, որն անօրինական կերպով գտնվում էր հայ-թուրքական սահմանի մոտ, հաղորդում է ՀՀ-ում ՌԴ ԱԴԾ Սահմանային վարչության մամուլի ծառայությունը։
«Շիրակի մարզի Երազգավորս գյուղի սահմանային գոտում հայտնվեց անծանոթ մի անձ, որը տեղի բնակիչներից հետաքրքրվում էր, թե ինչպես կարող է գնալ Թուրքիա` Սև ծովում հանգստանալու»,-ասված է հաղորդագրության մեջ։
Զգոն քաղաքացիներն օպերատիվ կերպով այդ մասին հայտնեցին Գյումրու սահմանապահ ջոկատի մոտակա ուղեկալ։ Ռուս սահմանապահների և ՀՀ իրավապահ մարմինների համատեղ ծրագրի համաձայն` գյուղ գնաց Ոստիկանության, ԱԱԾ և Գյումրու սահմանապահ ջոկատի համատեղ օպերատիվ խումբը։ Րոպեներ անց չարագործը ձերբակալվեց։
Անձնական զննության ժամանակ իրավախախտի մոտ հայտնաբերվեց Բելառուսի 1987թ. ծնված քաղաքացու անձնագիր, տարբեր երկրների 8 տեսակի արժույթ։ Ինչպես պարզվեց, օրինախախտը «պարզապես սիրում է ճամփորդել պատահական մեքենա կանգնեցնելով»։ Իրավապահ մարմինների աշխատակիցները նրան բացատրեցին, որ ՀՀ «Պետական սահմանի մասին օրենքի» 22-րդ հոդվածի համաձայն` նա խախտել է սահմանային գոտի մուտք գործելու և գտնվելու կարգը, նրան չի տրվել թույլտվություն համապատասխան մարմինների կողմից։
Ստուգման արդյունքում պարզվեց նաև, որ տվյալ քաղաքացին հաշվառման է կանգնած հոգեբույժի մոտ և 2015 թվականին 8 ամիս որոնվել է Բելառուսի կամավորների և ոստիկանների կողմից` որպես անհետ կորած։
Ավելի վաղ Sputnik Բելառուսը հաղորդել էր, որ 2015 թվականի մարտից Բելառուսում որոնվում էր Վիտեբսկ քաղաքի բնակիչ Լյուցկո Յուրի Անդրեևիչը (1978 թ. ծնվ.)։ Տղամարդը հոգեկան հիվանդություն ուներ։ Գործող օրենսդրության համաձայն` ձերբակալվածը հանձնվել է ՀՀ ԱԱԾ աշխատակիցներին` հետագա քննության համար։
