ԵՐԵՎԱՆ, 13 մարտի — Sputnik. Հայաստանի, Հունաստանի և Թուրքիայի փորձագետ կամավորները համախմբվել են Թուրքիայի ոչ մահմեդական ճարտարապետական ժառանգության պահպանման նախագծի շրջանակում, հայտնում է Anadolu գործակալությունը:
Նախագծի շրջանակում վտանգված մոտ 100 եկեղեցի, դպրոց, վանք ու սինագոգ կգրանցվի, կկազմվի կատալոգ: Նախագիծը կազմակերպել է Մշակութային ժառանգության պահպանության ասոցիացիան, ինչպես նաև Anadolu Culture-ը: Նախագծի համակարգող Կագլա Փարլակն ասել է, որ իրենց ջանքերն ուղղված են Թուրքիայի տարածքում գտնվող մոտ 140 կառույցի փրկությանը: Միայն մի քանի մարդ կա, որոնց կարելի է հայկական արվեստի մասնագետ համարել, նշել է նա` շեշտելով գիտելիքների և փորձի պակասը արվեստի պատմության ոլորտում:
Խումբը փաստագրելու է մշակութային կոթողներ Թուրքիայի 7 շրջանում, այդ թվում` Կայսերի գավառում, Ադանայի հարավում և Իզմիրում: Նախագիծը ֆինանսավորում է Անկարայում ԱՄՆ դեսպանատունը: Փորձագետներին անդամագրելու համար մոտ մեկ տարի է պահանջվել:
Փետրվարին նախագծի շրջանակում հրատարակվեց «Կայսերիի հայկական և հունական մշակութային ժառանգությունը» գիրքը, որտեղ ամփոփվեցին նախագծի առաջին արդյունքները: Գրքում ասվում է, որ 19-րդ դարի վերջում քաղաքում մոտ 15 000 հայ է ապրել: Ըստ տեղական ԶԼՄ-ների` այսօրվա դրությամբ այնտեղ 1 հայ է բնակվում:
Խումբն օգտվում է Ստամբուլում գործող «Հրանտ Դինք» հիմնադրամի պատրաստած տվյալներից: Հիմնադրամն աշխատել է 2 տարի` հայերի, հույների ասորիների և հրեաների կառուցած եկեղեցիների, սինագոգների, վանքերի, դպրոցների, հիվանդանոցների ու գերեզմանատների գույքագրում անցկացնելով: Գույքագրվել է մոտ 10 հազար հուշարձան Թուրքիայի ամբողջ տարածքում:
