ԵՐԵՎԱՆ, 13 մարտի — Sputnik. Տետրը Մայր Աթոռին հանձնել է երուսաղեմաբնակ մտավորական, բանաստեղծուհի Անուշ Նագգաշյանը, հայտնում է «Արևելք» կայքը:
Իր չափածո գործը Խրիմյան Հայրիկը վերնագրել է «Թագավորաց ժողով»: Ըստ Անուշ Նագգաշյանի` կարծիքներ կան, որ խոսքը վերաբերում է Բեռլինի վեհաժողովին, որտեղ առաջին անգամ միջազգային քննարկման է դրվել Հայկական հարցը: Հայտնի է, որ Կոստանդնուպոլսից Բեռլինի վեհաժողովին մասնակցում էր ազգային պատվիրակություն՝ Խրիմյան Հայրիկի գլխավորությամբ, որին թույլ չէին տվել մասնակցել վեհաժողովին: Խրիմյան Հայրիկը փորձել է այդ դեպքի հետ կապված իր խոհերն արտահայտել բանաստեղծությամբ:
Ինչպես նշեց Նագգաշյանը, ձեռագիրն իր մոտ է հայտնվել պատահաբար. Անգլիայից Աբրահամ Մնացականյանի դուստրն այն գտել է իր բարեկամների տանը, որոնք էլ իրենց հերթին մոտ 40 տարի առաջ մի հայի տուն են վարձել: Վարձակալները գնել են տան սեղանը, որը գաղտնի դարակ է ունեցել: Հենց այդ դարակում էլ ընդամենը վերջերս հայտնաբերվել է տետրը, որի հետ նաև՝ Խրիմյան Հայրիկի լուսանկարն ու հայ որբերի լուսանկարներ:
Անուշ Նագգաշյանը նշեց, որ այն ստանալով Աբրահամ Մնացականյանից` շտապել է Հայաստան՝ Մայր Աթոռ Սուրբ Էջմիածին և անձամբ Ամենայն Հայոց կաթողիկոսին հանձնել թանկարժեք ձեռագիրը, որը, ըստ բանաստեղծուհու, հայոց գանձարանի նմուշ է և որի տեղը միայն Հայաստանն է:
Բանաստեղծուհին հայտնեց նաև, որ ձեռագիր-տետրը շուտով կտպագրվի՝ հատուկ ծանոթագրությամբ:
