ԵՐԵՎԱՆ, 12 մարտի — Sputnik, Դավիթ Գալստյան. Էրեբունու ռուսական ավիակայանը գտնվում է մշտական պատրաստականության վիճակում և պարբերաբար բարելավում է օդաչուների թռիչքային վարպետությունը: Մարտի 12-ին կայացած ցուցադրական ելույթների ժամանակ դրանում անձամբ համոզվեցին նախագահ Սերժ Սարգսյանն ու Ռուսաստանի պետդումայի խոսնակ Սերգեյ Նարիշկինը:
Օդաչուների ռազմական վարպետությունը գնահատեցին նաև ՀԱՊԿ գլխավոր քարտուղար Նիկոլայ Բորդյուժան ու պաշտպանության նախարար Սեյրան Օհանյանը:
Ավիակայանի հրամանատարի տեղակալ, փոխգնդապետ Օլեգ Գրիցաենկոն ասաց, որ սահմանից այն կողմ գտնվում է թուրքական օդանավակայանը, ու հաճախ է պատահում, որ ցամաքում ռուսական հերթապահ ինքնաթիռները «համար 1» պատրաստության են բերվում:
«Հաճախ այն կողմից ինքնաթիռները բավական մոտենում են սահմանին: Այստեղից մինչև սահման 14 կմ է, ինչը որոշակի սահմանափակումներ է մտցնում օդային տարածքով տեղաշարժվելու համար: Սա հատուկ պայմաններով թռիչքային ռեժիմ է», — ասաց Գրիցաենկոն:
Նա նշեց, որ օդանավերը միայն մեկ անգամ են օդ բարձրացել, երբ Սիրիայում սկսվեցին ռազմական գործողությունները:
«Այն կողմից իրենց սկսեցին շատ հանդուգն պահել: Մենք օդ բարձրացրինք օդանավերը, ինչից հետո որևէ խախտում չի եղել», — ասաց օդաչուն:
Ցուցադրական ելույթների ժամանակ իր վարպետությամբ զարմացրեց ավիակայանի հրամանատար Ալեքսանդր Պետրովը: Բավական ցածր բարձրության վրա նա հավաքվածներին բարձրագույն վարպետության հնարքներ ցուցադրեց։
«Դուք մեզ մեծ վստահություն ներշնչեցիք», — ասաց Նարիշկինը ավիակայանի հրամանատար Պետրովին, երբ նա ծափողջույնների ուղեկցությամբ դուրս եկավ «Միգ» օդանավի սրահից։
Նարիշկինը հետաքրքրվեց օդաչուի զգացողություններով` նկատելով, որ թռիչքից հետո նրա տրամադրությունը բարձրացավ:
«Ասում են, որ օդաչուն թռիչքներով է ապրում, այստեղ դա պարզ դարձավ», — ծիծաղեց Պետրովը:
Սերժ Սարգսյանին, Սերգեյ Նարիշկինին ու Սեյրան Օհանյանին Պետրովը հուշանվերներ հանձնեց ռուսական ավիակայանի կողմից` Արարատի ֆոնին օդ բարձրացող Միգ-29-ի լուսանկար:
Օդաչուին ինչ-որ բան հարցրեց նաև Սարգսյանը, ամենայն հավանականությամբ` օդային մարտ վարելու մարտավարության մասին: Համենայն դեպս, այս մասին էր վկայում ավիակայանի ղեկավարի պատասխանը:
Նա պատասխանեց, որ օդաչուների խնդիրն է խոցել օդային թիրախը օդանավակայանից հնարավորինս հեռու: Եթե ինքնաթիռի բաց թողած հրթիռը չի ընկնում օդային թիրախի մեջ, միայն այդ դեպքում ինքնաթիռն անցնում է ավելի մոտ պայքարի:
«Մենք գիտենք, որ լուրջ հակառակորդ ունենք: Մենք հետևում ենք այլ երկրների օդաչուների թռիչքներին, եթե որևէ լավ բան ենք նկատում, ապա նկատի ենք ունենում», — ասաց Պետրովը:
Հյուրերի բարձր տրամադրությունից դատելով` կարելի է ասել, որ ներկայացումը նրանց դուր եկավ, թեև ցուրտ եղանակ էր, ու անձրև սկսվեց:
Չնայած երբ օդաչուներն օդ բարձրացան, ամպերը սկսեցին շարժվել դեպի Թուրքիայի կողմը։
