ԵՐԵՎԱՆ, 11 մարտի — Sputnik. ՖԻԴԵ-ի ղեկավար Կիրսան Իլյումժինովը Sputnik Արմենիա պորտալի հետ ունեցած բացառիկ հեռախոսազրույցի ընթացքում խոստովանեց, որ Հայաստանի նախագահը շատ լավ է շախմատ խաղում։
Իլյումժինով-Սարգսյան խաղը կայացել է Մոսկվայում, Հավակնորդների մրցաշարի բացման արարողությունից հետո, որին մասնակցում էր նաև հայ գրոսմայստեր Լևոն Արոնյանը։
«Ես նրան առաջարկեցի «բլից» խաղալ, այսինքն` հինգ-հինգ րոպե։ Սերժ Ազատովիչը սպիտակներով էր խաղում և կատարեց d2-d4 քայլը, ես պատասխանեցի` Кf6։ Մենք խաղացինք, այսպես կոչված, Ուֆիմցևի պաշտպանությունը մի փոքր այլ ձևով», — ասաց Իլյումժինովը։
Նա խոստովանեց, որ Սարգսյանը շատ լավ սկսեց խաղը և ՖԻԴԵ-ի ղեկավարին «ճնշեց» իր խաղաքարերով։
«Ես երկար էի մտածում, իմ դրոշակն ընկավ (ժամանակն ավարտվեց), և ես պարտվեցի։ Նա լավ է պատրաստված, բավական ուժեղ է խաղում, տեսական խորը գիտելիքներ ունի։ Այնպես ստացվեց, որ Հայաստանը հաղթեց ՖԻԴԵ-ին», — ծիծաղեց Իլյումժինովը։
Նա շնորհակալություն հայտնեց Հայաստանի նախագահին երկրում շախմատի զարգացման գործում ունեցած ավանդի համար` նշելով նրա դերը դպրոցական ծրագրում շախմատը ներառելու և շախմատի նոր դպրոցներ բացելու գործում։
Հավակնորդների մրցաշարը կավարտվի մարտի 30-ին։ Մրցաշարի հաղթողը կմրցի աշխարհի գործող չեմպիոն նորվեգացի Մագնուս Կարլսենի հետ։ Աշխարհի ուժեղագույն շախմատիստի կոչումը նվաճելու համար մղվող մրցապայքարը կանցկացվի 2016 թվականի նոյեմբերին ԱՄՆ-ում։
Մրցաշարին կմասնակցի 8 շախմատիստ` Լևոն Արոնյանը (Հայաստան), վերջին Գրան պրիի երկու հաղթողներ Հիկարու Նակամուրան ու Ֆաբիանո Կարուանան (երկուսն էլ` ԱՄՆ-ից), Աշխարհի գավաթի վերջին խաղարկության հաղթող Սերգեյ Կարյակինը և այս մրցաշարի հաղթող Պյոտր Սվիդլերը (երկուսն էլ Ռուսաստանից), Վեսելին Տոպալովը (Բուլղարիա), Անիշ Գիրին (Նիդեռլանդներ), ինչպես նաև 2014 թվականի համաշխարհային շախմատի թագի վերջին խաղի մասնակից Վիշվանաթան Անանդը (Հնդկաստան)։
