ԵՐԵՎԱՆ, 11 մարտի — Sputnik. Պետդումայի խոսնակ, ՀԱՊԿ ԽՎ նախագահ Սերգեյ Նարիշկինն այցելել է Սերգեյ Փարաջանովի թանգարան և ուսումնասիրել հանրահայտ ռեժիսորի կյանքն ու արվեստը արտացոլող ցուցանմուշները։
Ցուցանմուշները ներկայացրել է Փարաջանովի թանգարանի տնօրեն Զավեն Սարգսյանը։
Սերգեյ Փարաջանովի թանգարանը ստեղծվել է 1988 թվականին ՀՀ կառավարության որոշման համաձայն, Հայաստանում անցկացված առաջին ցուցահանդեսից հետո։
Այդ ժամանակ 40 աշխատանք է ձեռք բերվել և Ձորագյուղում համապատասխան տարածք հատկացվել Փարաջանովի թանգարանի ու տան համար։ 1988 թվականի երկրաշարժից հետո շինարարությունը դադարեցվել է, և թանգարանը բացվել է 1991 թվականին։
Հավաքածուում ներառված է ավելի քան 600 աշխատանք, որոնց մեծ մասը ցուցադրվել էր 1988 և 1989 թվականներին Երևանում անցկացված երկու ցուցահանդեսի ժամանակ։ Թանգարանում ցուցադրվում են նաև Փարաջանովի` Թիֆլիսի (Փարաջանովը ծնվել է Թբիլիսիում) տան կահավորանքն ու անձնական իրերը, որոնք Երևան էին տեղափոխվել դեռ նրա կյանքի օրոք։
Փարաջանովին համաշխարհային ճանաչում է բերել «Մոռացված նախնիների ստվերները» (1964) ֆիլմը։ 1965 թվականին ռեժիսորը սկսել է «Կիևյան որմնանկարներ» ֆիլմի նկարահանումները, սակայն նկարահանումների ավարտից հետո ֆիլմն արգելվել է: 1966 թվականին Փարաջանովին հրավիրել են Հայաստան, որտեղ նա սկսել է նկարահանել «Սայաթ-Նովա» ֆիլմը, որը «Նռան գույնը» անվանումով էկրան է բարձրացել 1969 թվականին և Փարաջանովի նկարահանած լավագույն ֆիլմը համարվել։
