ԵՐԵՎԱՆ, 11 մարտի — Sputnik. Մենք հանցագործություն ենք համարում թուրքական կողմից ռուսական Սու-24 ինքնաթիռի կործանումը: Նույնպես հանցագործություն ենք համարում ադրբեջանական կողմից հայկական ռազմական ուղղաթիռի կործանումը,- ասաց ՀԱՊԿ ԽՎ-ում Հայաստանի պատվիրակության ղեկավար, Ազգային ժողովի փոխնախագահ Էդուարդ Շարմազանովը։
Երևանում մեկնարկած ՀԱՊԿ ԽՎ Խորհրդի արտագնա նիստում քննարկվել են ահաբեկչական կազմակերպություններին հակազդելու միջոցներն ու Հարավային Կովկասի ռազմաքաղաքական իրավիճակը։
Նրա խոսքով` տարածաշրջանի համար, ՀԱՊԿ-ի համար ահաբեկչությունը, ֆաշիզմը, քսենոֆոբիան իրենց բոլոր արտահայտումներով իրական սպառնալիք են:
«Ուզում եմ բոլորիդ հավաստիացնել, որ հայկական պատվիրակությունը նույնպես կարծում է, որ պետք է պայքարել ահաբեկչության դրսևորման բոլոր ձևերի դեմ»,- ասաց Շարմազանովը։
Նրա կարծիքով` ՀԱՊԿ երկրների պատվիրակության բոլոր միջխորհրդարանական հարթակներում պետք է միասնական հանդես գան, քանի որ դաշնակիցներ են։
Շարմազանովը ևս մեկ անգամ հաստատեց, որ տարածաշրջանում բոլոր հակամարտությունները հնարավոր է լուծել միայն խաղաղ ճանապարհով։
ԼՂ հիմնախնդրի խաղաղ կարգավորումը ներառում է համատեղ ընդունված երեք սկզբունքները, այն է՝ ժողովուրդների ինքնորոշման իրավունք, տարածքային ամբողջականություն և ուժի չկիրառում: Եվ ադրբեջանական կողմի բոլոր փորձերը՝ կոնֆլիկտը լուծել ուժի կիրառման միջոցով, անընդունելի են»,- ասաց Շարմազանովը:
ՀԱՊԿ ԽՎ նախագահ, Պետդումայի խոսնակ Սերգեյ Նարիշկինն էլ իր հերթին ասաց, որ Կազմակերպության համար հիմնական վտանգը գալիս է Մերձավոր Արևելքից, մասնավորապես` Սիրիայում գործող ահաբեկչական խմբավորումներից։
«Ընդհանուր առմամբ ՀԱՊԿ-ի գործունեության բավական նորմատիվային հիմք է ստեղծվել ահաբեկչական սպառնալիքները վերացնելու համար», — ասաց Նարիշկինը։
Նրա խոսքով` ՀԱՊԿ-ի ուժերը մշտական պատրաստվածության մեջ են գտնվում և կարող են հակազդել սպառնալիքներին։
