ԵՐԵՎԱՆ, 11 մարտի — Sputnik. Հայաստանը նախկին խորհրդային երկրներից առաջինն է, որտեղ անցկացվելու է «Երեխաների սնուցման գլոբալ ֆորումը»: Ֆորումի կազմակերպման հարցերը քննարկվել է ՀՀ ԿԳ նախարար Լևոն Մկրտչյանի, ՄԱԿ-ի Պարենի համաշխարհային ծրագրի հայաստանյան գրասենյակի ղեկավար Պասկալ Միշոյի և ՌԴ Պարենի ճյուղային սննդի ինստիտուտի տնօրինության ներկայացուցիչների հանդիպման ժամանակ:
Ինչպես նշված է Կրթության և գիտության նախարարության պաշտոնական կայքում, հանդիպման ընթացքում քննարկվել են նաև «Կայուն դպրոցական սնունդ» ծրագրի շարունակականության ապահովմանը վերաբերող մի շարք հարցեր:
ՀՀ ԿԳ նախարար Լևոն Մկրտչյանը կարևորել է Պարենի համաշխարհային ծրագրի հետ համագործակցությունը։
«Նախարարությունը հաստատակամ է ՀՀ մարզերում «Կայուն դպրոցական սնունդ» ծրագրի շարունակականության ապահովման գործում»,- ընդգծել է նախարարը:
Ներկայում դպրոցական սննդի ծրագիրը 3 մարզում իրականացվում է ՀՀ կառավարության ֆինանսավորմամբ, իսկ մյուս մարզերում՝ Պարենի համաշխարհային ծրագրի՝ ՌԴ կառավարության օժանդակությամբ: Ծրագրից օգտվում է ՀՀ մարզերի տարրական դպրոցի շուրջ 90 հազար աշակերտ:
Հանդիպման ընթացքում անդրադարձել են ինչպես ծրագրի ֆինանսավորման մեխանիզմների կատարելագործման, այնպես էլ դպրոցներում ծրագրի իրականացման համար անհրաժեշտ նյութատեխնիկական միջոցների բարելավման հետ կապված հարցերին:
