ԵՐԵՎԱՆ, 11 մարտի — Sputnik. Դատարանին չի հաջողվել տեղեկություններ ստանալ Պերմյակովի ծառայակիցների գտնվելու վայրի վերաբերյալ, այս մասին հայտնի դարձավ Ավետիսյանների ընտանիքի սպանության գործով մարտի 11-ի դատական նիստի ժամանակ։
Հերթական արտագնա նիստի ժամանակ նախագահող Հարություն Մովսիսյանը տեղեկացրեց, որ Շիրակի առաջին ատյանի ընդհանուր իրավասության դատարանը դիմել էր 102-րդ ռազմակայանի հրամանատարությանը` Պերմյակովի ծառայակիցների գտնվելու վայրի ու հասցեների մասին տեղեկություն ստանալու նպատակով։
Դատարանը ծանուցում էր ստացել ռազմակայանից, որտեղ նշված է.
«Տվյալ յոթ անձինք այլևս չեն գտնվում ռազմակայանում ծառայության մեջ, այդ իսկ պատճառով վերջինների գտնվելու վայրի ու հասցեների մասին տեղեկություն 102-րդ ռազմակայանը չի կարող տրամադրել»։
Ռազմակայանից հայկական կողմին խորհուրդ են տվել վերջինների գտնվելու վայրը փորձել ճշտել անձնագրային կետերից, քանի որ նրանք այլևս Հայաստանում չեն և հատել են Հայաստանի սահմանը։
Ելնելով հանգամանքներից ` դատախազ Գևորգ Գևորգյանի միջնորդությամբ դատարանն անցել է փաստաթղթերի հրապարակման փուլին։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
