ԵՐԵՎԱՆ, 11 մարտի- Sputnik. Երևան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային զինծառայողներ Ռուսլան, Արկադի և Ռոման Հարությունյանների հայրը` Ռաֆայել Հարությունյանը, որդիների հետ գիշերն էր խոսել և news.am-ի հետ զրույցում նշեց, որ տղաները լավ տրամադրությամբ տուն էին վերադառնում։
«Իրենք որ գնացին, ես ու կինս վատառողջ էինք, զանգել էին, որ իմանան՝ ոնց ենք: Լավ էին, անընդհատ մեր մասին էին հարցնում, իրենցից շատ բան չասացին»,-պատմեց նա:
Ռաֆայել Հարությունյանը նշեց, որ իր միջնեկ որդին` Ռուսլանը, որը ողբերգական ավտովթարի հետևանքով մահացել է, դպրոցն ավարտելուց հետո գնացել է բանակ, այնուհետև անցել պայմանագրային ծառայության:
«Ռուսլանս որ գնաց, Արկադին ու Ռոմանն էլ որոշեցին գնան աշխատեն: Իրենք երեքով էին աշխատում, ընտանիք պահում»,-ասաց նա:
Հիշեցնենք, որ Երևան-Մեղրի ավտոճանապարհին մարտի 9-ին ուշ երեկոյան վթարի ենթարկված պայմանագրային երեք զինծառայողներ` Արկադի, Ռուսլան և Ռոման Հարությունյանները եղբայրներ են, Արկադին և Ռոմանը տարբեր մարմնական վնասվածքներով տեղափոխվել են ՀՀ ՊՆ Կենտրոնական կլինիկական զինվորական հոսպիտալ, իսկ նրանց երրորդ եղբայրը` Ռուսլանը մահացել է:
Հոսպիտալի պետ Արամ Ասատուրյանը հայտնել է, որ զինծառայողները բազմաթիվ կոտրվածքներ և սալջարդեր են ստացել, ծանր վիճակում են:
2016թ. մարտի 9-ին 23:00-ի սահմաններում, դեռևս չբացահայտված հանգամանքներում, Երևան-Մեղրի 80-րդ կմ-ում «Օպել» մակնիշի ավտոմեքենան դուրս էր եկել երթևեկելի մասից և մոտ 250 մետր գլորվել ձորը, ինչի հետևանքով երկու անձինք զոհվել են:
