ԵՐԵՎԱՆ, 11 մարտի- Sputnik. Ազգային վիճակագրական ծառայության տվյալով` 2016թ.-ի փետրվարին հունվարի համեմատ Հայաստանում 1.4% գնանկում է գրանցվել: Էժանացել են հիմնականում պարենային ապրանքները՝ 3.2%-ով: Իսկ ոչ պարենային ապրանքների գները նվազել են ընդամենը 0.6%-ով:
Բանջարեղենի գները փետրվարին հունվարի համեմատ նվազել են 13.4%-ով: Այս ցուցանիշը վիճակագիրները ստացել են հիմնականում կանաչ սոխի՝ 33.7%, խառը կանաչու` 22.3%, լոլիկի` 21.2%, վարունգի` 19.6%, սմբուկի` 14.7% էժանացման հաշվին: Բացի այդ, փետրվարին հունվարի համեմատ կանաչ պղպեղի գինը նվազել է 10.1%-ով, կաղամբինը` 6.5, գլուխ սոխինը` 5.6, սխտորինը` 0.7%-ով: Կարտոֆիլն էժանացել է 1.9%-ով, սունկը` 3, գազարը՝ 10.2, բողկը 29.3%-ով:
Միրգը վերջին մեկ ամսվա ընթացքում էժանացել է 3.3%-ով: Մրգերից ամենաշատն էժանացել է խնձորը` 9.6%-ով, կիտրոնը` 5.2, տանձը՝ 5.1, խաղողը` 2.7, նարինջը` 2.2%-ով:
Իսկ, օրինակ, չամիչը, մանդարինն ու արքայանարինջը թանկացել են՝ համապատասխանաբար 0.9, 6.2 և 13.6%-ով:
Նույն ժամանակահատվածում հացամթերքն էժանացել է 2.6%-ով, մակարոնեղենը՝ 2.3, լավաշը՝ 1.9, ձավարը՝ 1.4, սիսեռը՝ 0.7, բրինձը՝ 0.6, հաճարը՝ 0.4%-ով: Այս ապրանքային խմբում ևս գնանկման առաջատարն Աշտարակ քաղաքն է: Մայրաքաղաքում հացամթերքը շատ չի էժանացել` ընդամենը 2.2%-ով:
Մսամթերքը 2016թ. փետրվարին հունվարի համեմատ էժանացել է 0.5%-ով: Խոզի մսի գինը նվազել է 2.9%-ով, խոզապուխտինը՝ 1, տավարի մսի, թռչնամսի, նրբերշիկի գինը՝ 0.6%, ոչխարի մսի գինը՝ 2.6%-ով: Տավարի մսի պահածոյի գինը նվազել է 0.6%-ով, եփած, ապխտած և կիսապխտած երշիկներինը՝ համապատասխանաբար 0.5, 0.7 և 0.8%-ով:
Իսկ որոշ ապրանքներ փետրվարին հունվարի նկատմամբ ընդհակառակը՝ թանկացել են: Շաքարավազը թանկացել է 1.2% —ով, ոչ ոգելից խմիչքները` 0.1, ձուն՝ 0.3, սուրճը, թեյն ու կակաոն՝ 0.6% —ով: Ոգելից խմիչքների ու ծխախոտի գներն այդ ժամանակահատվածում չեն փոխվել:
Ոչ պարենային ապրանքները հունվարի համեմատ էժանացել են 0.6%-ով: Այս ցուցանիշի վրա մեծապես ազդել է հագուստի և գործվածքեղենի 2.8% գնանկումը: Կոշկեղենի գինը նվազել է 1.1, վառելիքինը` 1, լվացող միջոցների և դեղորայքի գները` 0.4%-ով:
Բնակչությանը մատուցված ծառայությունները ևս հունվարի համեմատ թանկացել են: Կրթական համակարգում սակագներն աճել են 0.4%-ով, մշակույթի ոլորտում՝ 1%-ով, բուժսպասարկման ոլորտում՝ 2.2, հանրային սննդի և կենցաղային բնույթի ծառայությունների սակագները՝ 0.1-0.2%-ով: Օդային ուղևորափոխադրումների սակագներն աճել են 0.6%-ով:
