ԵՐԵՎԱՆ, 11 մարտի — Sputnik. Հայաստանի ՏՏ ընկերությունները կարող են մասնակցել Հայաստան-ԱՄՆ աքսելերացիոն ծրագրին՝ Էլեկտրոնային հասարակության և մրցունակության համար նորարարության ծրագրի շրջանակում, հայտնում են Ձեռնարկությունների ինկուբատոր հիմնադրամից:
Աքսելերացիոն ծրագրին կարող են մասնակցել ՏՏ ոլորտի նորաստեղծ և նոր լուծումներ առաջարկող ընկերությունները: Ծրագիրը ներառում է սեմինարներ, մենթորություն, ինչպես նաև Հայաստանում ու ԱՄՆ-ում գործարար կապեր հաստատելու հնարավորություն:
«Հայաստանյան փուլն անցած ընկերություններից կընտրվեն 5-ը, որոնք կմասնակցեն 2016 թ. հունիսին Սիլիկոնյան հովտում կայանալիք Հայաստանի ՏՏ ոլորտի սկսնակ ընկերություններին նվիրված համաժողովին՝ հնարավոր ներդրողների, գործընկերների, հաճախորդների և աքսելերատորների հետ կապեր հաստատելու նպատակով: Մասնակիցները հնարավորություն կունենան աշխատելու նաև CEED-ի համաշխարհային ցանցի անդամ գործարարների և ներդրողների հետ»,- ասված է հաղորդագրությունում:
Ծրագրում ներառված են մի շարք թեմաներ՝ ապրանքատեսակի համապատասխանությունը շուկային, հաճախորդների հետ հարաբերությունների կազմակերպում, լուծումների/ապրանքատեսակի դիրքավորում, ընկերության աճի և զարգացման հեռանկարներ։
Ըստ կազմակերպիչների` հաջողակ ձեռներեցները և փորձագետները կուղղորդեն մասնակիցներին բիզնես մոդելի առաջխաղացման, շուկայում ներկայանալու ռազմավարության մշակման, արտասահմանյան ներդրողների և հաճախորդների հետ աշխատելու հմտությունների ձեռք բերման, ինչպես նաև հետագա քայլերի պլանավորման հարցերում:
Ծրագիրն իրականացնում են Ձեռնարկությունների ինկուբատոր հիմնադրամը (ՁԻՀ), Հայաստանի կառավարությունը և Համաշխարհային բանկը`Ձեռներեցության զարգացման և ղեկավարների վերապատրաստման կենտրոն (CEED) հիմնադրամի հետ համագործակցությամբ։
Դիմումի վերջնաժամկետն է մարտի 15-ը:
