ԵՐԵՎԱՆ, 11 մարտի — Sputnik. Շախմատի միջազգային ֆեդերացիայի (ՖԻԴԵ) նախագահ Կիրսան Իլյումժինովը մրցաշարի բացման ժամանակ իր ելույթում երախտագիտություն հայտնեց Հայաստանի նախագահ Սերժ Սարգսյանին, հաղորդում է sports.ru-ն։
«Ցանկանում եմ շնորհակալություն հայտնել Սերժ Սարգսյանին այն բանի համար, որ Հայաստանն աշխարհում առաջին երկիրը դարձավ, որտեղ շախմատը դասավանդվում է դպրոցներում որպես պարտադիր առարկա։ Նաև ցանկանում եմ շնորհակալություն հայտնել Ռուսաստանի շախմատի ֆեդերացիայի նախագահ Անդրեյ Ֆիլատովին»,- ասաց նա։
Հայաստանում շախմատը դպրոցական ծրագիր է մտել 2011
թվականից։
ՖԻԴԵ-ի նախագահը նշեց, որ երկու շաբաթ Մոսկվան կդառնա շախմատի համաշխարհային կենտրոն։
ՌՇՖ նախագահ Ֆիլատովը նշեց, որ տոնը չէր ստացվի առանց Հայաստանի նախագահի, ով Մոսկվային նվիրեց հավակնորդների այս մրցաշարը։
Նշենք, որ հայկական շախմատի առաջատար Լևոն Արոնյանն առաջին տուրում սևերով կմրցի հոլանդացի Անիշ Գիրիի հետ։
Մրցաշարը կտևի մինչև մարտի 30-ը։
Ռուսաստանի Դաշնության մայրաքաղաքում կայանալիք մրցաշարին կմասնակցեն Հիկարու Նակամուրան, Ֆաբիանու Կարուանան, Սերգեյ Կարյակինը, Պյոտր Սվիդլերը, Վեսելին Տոպալովը, Անիշ Գիրին, Վիշի Անանդը: Մոտ 420 հազար եվրո մրցանակային հիմնադրամ ունեցող մրցաշարի հաղթողը իրավունք կստանա նորվեգացի Մագնուս Կարլսենի հետ վիճարկել աշխարհի չեմպիոնի տիտղոսը։
