ԵՐԵՎԱՆ, 11 մարտի — Sputnik. Հաշվի առնելով, որ ավանդների համար դեռևս կան 1931թ.-ին ծնված դիմողներ, այս տարի ևս ծննդյան թվի փոփոխության վերաբերյալ որոշում չի կայացվել:
Առկա է մեծ հերթ, որը հազիվ թե հնարավոր լինի այս տարի սպառել, այսինքն`վճարել, պարզաբանեց Արմեն Մարգարյանը։
ԽՍՀՄ Խնայբանկում մինչև 1993 թ-ի հունիսի 10-ը ներդրված դրամական ավանդների դիմաց փոխհատուցում ստանալու իրավունք ունեն մինչև 1931թ.-ի դեկտեմբերի 31-ը ծնված, այսինքն` 85 տարեկան և բարձր տարիքի անձինք, ինչպես նաև պաշտպանության մարտական գործողությունների մասնակիցներն ու սահմանամերձ համայնքների բնակիչները, որոնք հաշվառված են մինչև 2014թ.-ի օգոստոսի 1-ը։
Ավանդների փոխհատուցման ծրագրի համար 2016թ.-ի պետական բյուջեի մասին օրենքով հատկացվել է 1 մլրդ 485 մլն դրամ։ 2016թ.-ի փետրվարի դրությամբ սոցիալական խմբով հաշվառված է 14 571 տարեց, շուրջ 4200 ազատամարտիկ և սահմանամերձ շրջանների 13 227 բնակիչ։
«Ծրագիրը կշարունակվի մինչև 2019 թվականը։ Ամեն ամիս վճարման ցուցակներում ընդգրկվում է 600-650 ավանդատու։ Նրանց մի մասը տարեց կենսաթոշակառուներ են, մյուս մասը՝ սահմանամերձ շրջանների բնակիչներ ու ազատամարտիկներ»,- ասաց Մարգարյանը` նշելով, որ ծրագիրն իրականացնելիս չի լինելու որևէ բացառություն, նաև չեն լինելու հաշվառման մեջ հերթն առաջ կամ ետ գցելու դեպքեր։
